काठमाडौं । त्रिभुवन विमानस्थलबाट पक्राउ परेका रोहन अडुकियाको ‘क्विन्टल सुन तस्करी प्रकरण’मा संलग्नता नरहेको प्रहरीले जनाएको छ । प्रहरी प्रवक्ता डीआईजी कुवेर कडायतले रोहन अडुकिया सुन तस्करी प्रकरणका आरोपी नभएको बताए ।

“हामीले अडुकियालाई खोजेका थिएनौँ । विमानस्थल प्रहरीले नियन्त्रणमा लिएर राजस्व अनुसन्धान विभागको जिम्मा दिएको हो । सुन प्रकरणसँग अहिलेसम्म उनको संलग्नता देखिएको छैन,” डीआईजी कडायतले भने ।

विमानस्थल प्रहरीले भने अडुकियालाई अध्यागमनको कालोसूचीमा रहेको कारण पक्राउ गरेर विभागलाई बुझाएको थियो ।  स्रोतले दिएको जानकारीअनुसार विभागले केन्द्रीय अनुसन्धान ब्यूरोमा बुझाएको थियो । ब्यूरोले पनि रोहन आफूहरुको सूचीमा नरहेको जवाफ दिएको स्रोत बताउँछ ।

राजश्व अनुसन्धान विभाग स्रोतले दिएको जानकारीअनुसार अध्यागमनले कालोसूचीमा राखेको आधारमा विमानस्थल प्रहरीले पक्राउ गरेको थियो । पक्राउ परेका अडुकियालाई राजश्व अनुसन्धान विभागमा लगिएको थियो ।

विभागले स्रोतले भन्यो, “अडुकियालाई हामीले खोजेका होइनौँ । हामीले बुझ्न मानेनौँ । हामीले अनुसन्धान गरेका पनि छैनौँ । हामीले किन बुझ्ने ? भाँडा एकातिर हुने पानी अर्कोतिर जम्मा हुन्छ ?”

पक्राउ परेका अडुकिया राकेश अडुकियाका छोरा हुन् । राकेशले लगातार मिडियामा छोरालाई भगायो भन्ने लेखेपछि आफूले नेपालमा बोलाएको बताए । तर नेपाल आएपछि अध्यागमन विभागले उनलाई समातेको हो ।

“भगायो भन्ने आरोप लागेपछि नेपाल बोलाएको हुँ । इमिग्रेसनले विभाग र प्रहरीलाई बुझाउने प्रयास गर्‍यो तर ती निकायले खोजी गरेका व्यक्ति होइनन् भनेर लिएन । फेरि इमिग्रेसनमै लगेर राखिएको छ ।”

उनका अनुसार पछिल्लो समयमा जे प्रकरणमा पनि आफूहरुलाई जोडेर लगातार दुःख दिने काम भइरहेको छ ।

“मिडियाले लगातार लेखेपछि बोलाएको हुँ । हामीले केही गरेकै छैनौँ भने किन भागेर हिँड्नु भन्ने लागेर बोलाएको हुँ,” राकेशले भने, “यस्तो असुरक्षित माहोलमा कसरी काम गर्ने ? जसलाई जे मन लाग्यो त्यही गर्न पाउने व्यवस्था छ ?”

विमानस्थल प्रहरी प्रमुख डीआईजी अर्जुन चन्दले कालोसूचीमा राखेका व्यक्तिलाई पक्राउ गर्नू भन्ने पत्र आएकाले समातिएको बताए । “हामीलाई यो नम्बरको पासपोर्टबाहकलाई पक्राउ गर्नू भन्ने पत्र आएको थियो, त्यही आधारमा पक्राउ गरेर अध्यागमन विभागलाई बुझाएका हौँ,” उनले भने ।

तर अध्यागमन विभागले भने पक्राउबारे केही बताएको छैन । अडुकिया अहिले पनि अध्यागमन विभागको नियन्त्रणमै रहेको प्रहरी स्रोत बताउँछ ।