काठमाडौं । फेसबुकका संस्थापक तथा अर्बपति मार्क जुकरबर्गले अल्टिमेट फाइटिङ च्याम्पियनसिप (यूएफसी) मिडलवेटका च्याम्पियनसँग प्रशिक्षण गरिराखेको तस्बिर सार्वजनिक भएको छ ।

जुकरबर्गलाई यसअघि अर्का धनाढ्य तथा स्पेस एक्सका मालिक एलन मस्कले ‘केज म्याच’का लागि चुनौती दिएका थिए । अन्तर्राष्ट्रिय सञ्चारमाध्यमहरुका अनुसार मस्कको चुनौती स्वीकार गरेका जुकरबर्गले त्यसैको तयारीका लागि प्रशिक्षण सुरु गरेका हुन् । उनले ट्विटरमा ‘यो निकै गम्भीर काम हो’ लेख्दै तीन फोटो पोस्ट गरेका छन् ।

जुकरबर्गले प्रशिक्षण गरिराखेको तस्विर यूएफसी मिडलवेट च्याम्पियन इजराइल अडेसान्याले ट्विटरमा सार्वजनिक गरेका छन् ।

मस्कसँग जुकरबर्गको सम्भावित लडाइँको विषय पछिल्लो हप्तायता निकै चर्चाको विषय बनिरहेको छ ।

यस विषयमा यूएफसीका अध्यक्ष डाना ह्वाइटले हालै न्युयोर्क टाइम्सलाई आफूले दुई धनाढ्यहरुबीचको लडाइँका लागि मद्दत गर्ने बताएका थिए । हालसम्म जुकरबर्ग र मस्कबीचको ‘फाइट’ हुन्छ भन्नेबारे भने निश्चित भइसकेको छैन ।

लडाइँको लागि मस्कको तयारी पनि सार्वजनिक भएको छ । यसअघि मस्कले ब्राजिलियन जिउ–जित्सु ब्ल्याक बेल्ट लेक्स फ्रिडम्यानसँग गरेको प्रशिक्षणको तस्बिरहरू केही हप्ताअघि सार्वजनिक भएको थियो ।