काठमाडौं । जलविद्युत लगानी तथा विकास कम्पनी (एचआईडीसीएल)ले निजी क्षेत्रका आयोजनालाई ‘सफ्ट लोन’ (सस्तो ब्याजदरको कर्जा) उपलब्ध गराउने बताएको छ ।

एचआईडीसीएलका प्रमुख कार्यकारी अधिकृत (सीईओ) अर्जुनप्रसाद गौतमले एचआईडीसीएल अब निजी क्षेत्रले विकास गर्ने जलविद्युत आयोजनामा पनि एचआईडीसीएलले स्वँपुजी र ऋण दुवै लगानी गर्ने बताएका छन् ।

स्वतन्त्र ऊर्जा ऊत्पादकहरूको संस्था, नेपाल (इप्पान)को नव निर्वाचित कार्यसमितिलाई स्वागत गर्दै सीईओ गौतमले एचआईडीसीएल अब ऊर्जालक्षित पूर्वाधार बैंक बन्नेगरी अघि बढेको बताए । त्यसका लागि कम्पनीको पुँजी २५ अर्ब मात्र भएपनि बित्ततय लिभरेज उपयोग गरेर एक खर्व ५० अर्ब सम्मको लगानी सक्ने अवस्थामा रहेको बताए ।

स्वतन्त्र उर्जा उत्पादकहरूको संस्था नेपाल इप्पानले उठाएको लगानीको अभावको अवस्थामा सहजीकरण गर्ने विषय एचआईडीसीएलको  साझा मुद्दा भएको भन्दै इप्पानसँग मिलेर अघि बढ्ने गौतमको भनाइ थियो ।

“विगतमा जस्तो कम्पनीले अब जलविद्युत आयोजनाको लाइसेन्स लिँदैन । देशलाई समृद्ध बनाउने ऊर्जा क्षेत्रमा देखिएको वित्तीय लगानीको खाडल पूरा गर्न विदेशबाट ग्रीन फण्ड, पेन्सन फण्ड जस्ता सस्तो फण्ड ल्यएर जलविद्युतमा लोन र इक्वीटी दुवैमा लगानी गर्छौ,” गौतमले भने ।

विदेशबाट ग्रीन बण्ड ल्याएर वा नेपालमै पनि बण्ड जारी गरेर जलविद्युत आयोजनालाई ‘सफ्ट लोन’ उपलब्ध गराउन एचआईडीसीएल अघि बढेको उनको भनाइ थियो ।

इप्पान अध्यक्ष गणेश कार्कीले ७/८ प्रतिशत ब्याजदरमा वित्तीय व्यवस्थापन गरेका आयोजनाको बैंकको ब्याजदर १४/१५ प्रतिशतसम्म पुगेको भन्दै एचआईडीसीएलले निजी क्षेत्रका आयोजनामा गरिएको लगानीको व्याजदरमा स्थिरता कामय गरिदिए धेरै राम्रो हुने बताए ।