काठमाडौं । युवा तथा खेलकुदमन्त्री डिगबहादुर लिम्बूले अर्थमन्त्रीले मात्र जिल्लामा बजेट लगेको आरोप लगाएका छन् ।
आजदेखि सानेपामा सुरु भएको नेपाली कांग्रेसका जिल्ला सभापतिहरुको भेलालाई सम्बोधन गर्दै मन्त्री लिम्बूले आफूले भने मन्त्री भएर पनि जिल्लामा बजेट लैजान नसकेको बताएका बैठकमा सहभागी एक नेताले जानकारी दिए ।
“अर्थमन्त्रीले बजेट आफ्नो जिल्लामा लगे । समानुपातिक बजेट वितरण भएन,” जिल्ला सभापतिहरुसँग असन्तुष्टि पोखेका मन्त्री लिम्बुको भनाइ उद्धृत गर्दै ती नेताले भने, “म मन्त्री त हुँ । तर, मैले मेरो जिल्लामा बजेट लैजान सकिनँ ।”
उनले बजेट समानुपातिक वितरण गर्ने र आवश्यक ठाउँमा पठाउनेभन्दा शक्तिको आडमा कसले बढी लैजाने भन्ने प्रतिस्पर्धा भएको बताए ।
बैठकमा संखुवासभाका सभापति दीपक खड्का र रामेछाप सभापति कान्छाराम तामाङसहितका सांसदहरुले सरकारले आफ्नै सांसदलाई समेत अनुभूति गराउन नसकेको भनेर विरोध जनाए ।
