काठमाडौं । ललितानिवास जग्गा प्रकरणमा पक्राउ परेकाको बन्दीप्रत्यक्षीकरणसम्बन्धी रिट आज न्यायाधीशद्वय विश्वम्भरप्रसाद श्रेष्ठ र कुमार रेग्मीको इजलासमा परेको छ ।

पूर्वनिर्वाचन आयुक्त सुधीरकुमार शाह, भाटभटेनी सुपरमार्केटका संस्थापक अध्यक्ष मीनबहादुर गुरुङ र धर्मप्रसाद गौतमका तर्फबाट सर्वोच्च अदालतमा रिट दायर गरिएको हो । सो प्रकरणमा आफूहरूलाई कानुनविपरीत पक्राउ गरिएको उनीहरूको जिकिर छ ।

रिटमा प्रारम्भिक सुनुवाइपछि न्यायाधीश डा. कुमार चुडालको इजलासले कारण देखाऊ आदेश जारी गरेको थियो । यस्तै, यसअघि यही प्रकरणमा मुछिएका केदार घिमिरेसहितले दायर गरेको रिटलाई समेत सँगै राखी सुनुवाइ गर्ने आदेश दिएको थियो ।

घिमिरेसहितले आफूहरूलाई पक्राउ नगर्न माग गर्दै रिट दायर गरेका थिए । न्यायाधीश ईश्वरप्रसाद खतिवडाको इजलासले रिट निवेदकलाई तत्काल पक्राउ नगर्न अन्तरिम आदेश दिइएको थियो ।

खतिवडाको इजलासले जारी गरेको आदेशको ‘भ्याकेट’ निवेदन समेत सँगै राखी आज न्यायाधीशद्वय श्रेष्ठ र रेग्मीको इजलासमा पेसी चढेको छ । तर, न्यायाधीश रेग्मी उक्त प्रकरणमा आफैँ सम्बन्धित रहेकाले सुनुवाइ हुने/नहुने टुंगो छैन ।