काठमाडौं । सत्तारुढ नेपाली कांग्रेसका सांसद एवं पूर्वअर्थराज्यमन्त्री उदय शमशेर राणाले प्रधानमन्त्री पुष्पकमल दाहाल प्रचण्डले भारतीय नागरिक प्रितम सिंहबारे दिएको अभिव्यक्ति गलत रहेको टिप्पणी गरेका छन् ।

प्रधानमन्त्रीले भारतीय नागरिक सिंहले आफूलाई प्रधानमन्त्री बनाउन भारतमा गएर पटकपटक पहल गरेको भन्ने अभिव्यक्ति बोल्न मिल्ने खालको नभएको उनले प्रतिक्रिया दिए ।

बुधबार प्रधानमन्त्रीको सोही अभिव्यक्तिलाई लिएर नेकपा (एमाले)सहितका विपक्षी दलहरुले राजीनामा माग गर्दै संसद् बैठक अवरुद्ध पारेका थिए ।

सोही सन्दर्भमा संघीय संसद् भवन परिसरमा सञ्चारकर्मीहरुले राखेका जिज्ञासाको जवाफ दिने क्रममा सांसद राणाले प्रधानमन्त्रीले सो विषयबारे संसद्मा चाडोभन्दा चाडो स्पष्टीकरण दिनुपर्ने माग समेत गरे ।  एमालेसहितका विपक्ष दलहरुले त्यसप्रति आपत्ति जनाएपछि प्रधानमन्त्रीले संसद्मा उभिएर त्यसबारे स्पष्ट पार्नुपर्ने उनको भनाइ छ ।

“एमालेले राजीनामा खोज्यो । अब राजीनामाको माग उहाँहरुको हो,” उनले भने, “हाम्रो भनाइचाहिँ प्रधानमन्त्रीले हाउसमा आएर विपक्ष दलले बोलेपछि हामीलाई पनि स्पष्ट बनाइदिनु पर्छ ।

सांसद राणाले आफ्नो पार्टी तत्काल सरकार परिवर्तन गर्ने पक्षमा भने नरहेको बताए ।