काठमाडौं । सञ्चार तथा सूचना प्रविधिमन्त्री एवम् सरकारकी प्रवक्ता रेखा शर्माले प्रदेशको नामकरणका विषयमा कसैलाई जिल्ला प्रवेशमा रोक्ने कुरा राम्रो नभएको बताएकी छन् । 

असार १२ गते बसेको मन्त्रिपरिषद्को बैठकको निर्णय सुनाउने क्रममा बिहीबार सञ्चारकर्मीको जिज्ञासामा शर्माले नेकपा (एमाले) सचिव योगेश भट्टराईलाई कार्यक्रममा जाँदा इलाममा कालो झण्डा देखाएको विषयमा त्यस्तो बताएकी हुन् । 

“लोकतन्त्रमा कसैले पनि आफ्नो कुरा राख्न पाउँछ । अधिकारको पक्षपोषण गर्न पाउँछ । त्यो आफ्ना ठाउँमा छ । तर, त्यसका ठाउँमा जुन गतिविधि बढिरहेका छन्,” उनले भनिन्, “कसैले कसैलाई जिल्ला प्रवेश निषेध भन्ने कुरा आफैँमा राम्रो कुरा होइन । त्यो गर्नुहुँदैन ।” 

आन्दोलनकारी पक्षलाई प्रधानमन्त्री पुष्पकमल दाहाल ‘प्रचण्ड’ले बोलाएर छलफल गरेको भन्दै पछिल्लो घटनाप्रति सरकारको ध्यानकर्षण भएको बताइन् । 

नामाकरणको विषयमा आफ्नो कुरा राख्ने र प्रदेशका पार्टीहरूलाई कन्भिन्स गर्नेतर्फ जानुपर्नेमा आन्दोलनरत पक्षले अराजकता प्रदर्शन गरेको उनको भनाइ छ ।