काठमाडौं । नुवाकोटमा भरुवा बन्दुकसहित दुईजना पक्राउ परेका छन् ।

किस्पाङ गाउँपालिका–१, नोचेतस्थित म्यानम्यान सामुदायिक जंगलछेउबाट भरुवा बन्दुक एकथानसहित शुक्रबार (हिजो) राति प्रहरीले उनीहरूलाई नियन्त्रणमा लिएको हो । पक्राउ पर्नेमा सोही ठाउँका ४५ वर्षीय कुलबहादुर तामाङ र २६ वर्षीय लालिमान तामाङ छन् ।

कुलबहादुर, लालिमान र सोही ठाउँका १९ वर्षीय विजय तामाङ ‘लोड’ अवस्थामा रहेको भरुवा बन्दुक लिई दुम्सी मार्न हिँडेका थिए । अचानक त्यो बन्दुक पड्कँदा विजय घाइते भएको भन्ने सूचना प्रहरीले पायो । त्यसपछि खटिएको प्रहरी टोलीले उनीहरूलाई सो बन्दुकसहित पक्राउ गरेको हो ।

गम्भीर घाइते विजयलाई उपचारका लागि जिल्ला अस्पताल हुँदै काठमाडौंस्थित वीर अस्पतालमा पठाइएको प्रहरीले जनाएको छ ।