काठमाडौं । सामसङले नेपालमा अब शून्य प्रतिशत ब्याजदरमै किस्ताबन्दीमा फोन उपलब्ध गराउने भएको छ । बुधबार काठमाडौंमा आयोजित एक कार्यक्रममार्फत कम्पनीले ‘सामसङ इन्स्टा फाइनान्स सेवा’ सार्वजनिक गरेको हो ।

कम्पनीले सामसङको रिटेल स्टोरमा पुगेको एक घण्टाभित्रै किस्ताबन्दीमा फोन उपलब्ध गराउने लक्ष्य राखेको छ । सामसुङ नेपालका प्रबन्ध निर्देशक सुङ जुन पार्कले यो सेवाले कैयौँ नेपालीलाई गुणस्तरीय उत्पादन खरिद गर्न मद्दत पु¥याउने बताए ।

सामसङ नेपालका निर्देशक प्रणयरत्न स्थापितले अब कोही नेपालीले गुणस्तरीय फोन किन्दा दुईपटक सोच्नुपर्ने स्थिति नआउने उल्लेख गरे ।

२५ हजार रुपैयाँभन्दा माथिका फोन खरिद गर्दा एकैपटक भुक्तानी गर्न असहज हुने स्थिति रहेको पनि उनले बताए । त्यसैले ४० प्रतिशत डाउन पेमेन्ट मात्र गरी बाँकी रकम शून्य प्रतिशत ब्याजदरमा तीनदेखि १२ महिनासम्म भुक्तानी गर्न सकिने गरी सामसङले इन्स्टा फाइनान्स सेवा सञ्चालनमा ल्याएको उनले जानकारी गराए ।

बैंकिङ फाइनान्स निकै झन्झटिलो रहेको भन्दै उनले यो सहज रहेको बताए ।

गोल्छा ग्रुपका अध्यक्ष शेखर गोल्छाले हुलास फिन सर्भिस लिमिटेडले एक घण्टामै सेवा दिने गरी यो सुविधा उपलब्ध गराउन लागेको बताए ।

मोबाइल इम्पोटर्स एसोसिएसनका अध्यक्ष दीपक मलोहत्राले सहजै किस्ताबन्दीमा फोन किन्न सकिने स्थिति बन्दा मोबाइलको व्यापार बढाउन सहयोग पुग्ने विश्वास व्यक्त गरे ।

कसरी लिन सकिन्छ सामसङ इन्स्टा फाइनान्स गर्दै फोन ?
कोही व्यक्तिले तीन किसिमका कागजात उपलब्ध गराउँदै सामसङ इन्स्टा फाइनान्समार्फत फोन खरिद गर्न सक्नेछन् ।

यो सेवा अहिले २० सहरका २०० भन्दा बढी पसलमा सञ्चालनमा आइसकेको छ । यसका लागि सामसङका ती पसलमा फोन खरिद गर्न जानेले आफ्नो नागरिकता र फोटो उपलब्ध गराउनुपर्ने हुन्छ ।

त्यसपछि आफूसँगै कोही एक ‘ग्यारेन्टर’ व्यक्ति लैजानुपर्ने हुन्छ । ती व्यक्तिको नागरिकता र फोटो पनि आवश्यक पर्छ । आफ्नो र ग्यारेन्टरको नागरिकताको फोटोकपी सामसङको पसलमा बुझाउनुपर्छ ।

यस्तै, आफ्नो आम्दानीको स्रोत खुलाउनुपर्ने र यसरी करिब एक घण्टाभित्रै फाइनान्समा फोन खरिद गर्न सकिने कम्पनीले जनाएको छ ।

आम्दानीको स्रोतमा आफूले काम गर्ने भए त्योसम्बन्धी विवरण, कम्पनी वा संस्था भए त्यसको र घरभाडाबाट आम्दानी हुने भए त्यस्तो विवरण पेस गर्नुपर्छ ।

त्यसपछि तीनदेखि १२ महिनाका लागि फाइनान्स गर्न सकिनेछ । कम्पनीले उपलब्ध गराएको बैंक वा वित्तिय संस्थाको अकाउन्ट वा सोही पसलमा ग्राहकले मासिक रूपमा रकम बुझाउनुपर्छ ।

इन्स्टा फाइनान्स सेवा सञ्चालनका लागि कम्पनीले करिब चार अर्ब रुपैयाँ छुट्ट्याएको बताइएको छ ।