काठमाडौं । बेलायतकी टेनिस खेलाडी इमा राडुकानुले 'कहिलेकाहीँ आफूलाई यूएस ओपनको उपाधि नजितेको भए हुन्थ्यो' जस्तो लाग्ने गरेको बताएकी छन् । उपाधि जित्दा पाएको सफलता र प्रसिद्धिका कारण चर्को दबाब सिर्जना भएकाले आफूलाई त्यस्तो लागेको उनको भनाइ छ । 

२०२१ को यूएस ओपन फाइनल खेल्नुअघि खेलेका नौ खेलमा राडुकानुल एक सेट पनि हारेकी थिइनन् । राडुकानुले १८ वर्षको उमेरमा यूएस ओपनको उपाधि जितेकी थिइन् । त्यसपछि बारम्बार चोटबाट गुज्रिएपछि राडुकानु लय भेटाउन सकेकी छैनन् । 

“त्यो क्षण, जब म कोर्टमा उत्सव मनाउँदै थिएँ । मलाई लागेको थियो, यस क्षणका लागि म संसारमा कुनै पनि संघर्ष गर्न तयार छु,” राडुकानुले सन्डे टाइम्ससँग भने, “त्यस बेलादेखि मैले एकपछि अर्को धेरै अप्ठ्यारा क्षणहरू भोगेको छु । मैले धेरै सहेको छु । मेरो सहनशीलता उच्च छ । तर यो सबै सजिलो छैन । र कहिलेकाहीँ सोच्छु, मैले यूएस ओपन कहिल्यै नजितेको भए हुने ।”

१८ वर्षकै उमेरमा ग्रान्डस्लाम जितेपछि राडुकानुले थुप्रै प्रशंसा बटुलिन् । त्यस सफलताले राडुकानुलाई फरक दुनियाँमा पुर्‍याइदियो । जहाँ उनीसँग अपेक्षा गर्नेहरूको संख्या बढ्यो । 

“म चाँडै परिपक्व भएँ । जतिबेला मैले उपाधि जितेको थिएँ, त्यतिबेला मसँग धेरै अनुभव थिएन,” राडुकानुले भनिन्, “मैले पछिल्लो दुई वर्षमा धेरै संघर्ष गरेको छु । कुनै पनि प्रतियोगितामा मैले राम्रो गर्न सकेको छैन ।”

घुँडाको चोट र नाडीको शल्यक्रियाका कारण राडुकानुले यस वर्षको फ्रेन्च ओपन गुमाएकी थिइन् । चोटका कारण राडुकानुले विम्बल्डन पनि गुमाउने छिन् । 

“गत वर्षको विम्बल्डन पछि दुखाइ बढ्यो,“ राडुकानुले भनिन्, “मैले नयाँ प्रशिक्षकसँग प्रशिक्षण सुरु गरेको थिएँ । साँच्चै म धेरै उत्प्रेरित पनि थिए । मैले दुखाइका बाबजुद पनि प्रशिक्षण जारी राखेको थिए । किनकि म कमजोर देखिन चाहन्न थिएँ ।” 

पछिल्लो समय सेबास्टियन साक्ससँग अलग भएपछि राडुकानु प्रशिक्षकविहीन छिन् ।