काठमाडौं । पोल्याण्डकी इगा स्वाएटेकले पेरिसको ‘क्ले कार्ट’मा आफ्नो प्रभुत्व कायम राख्दै शनिबार राति फ्रेन्च ओपनको उपाधि जितेको छ ।

विश्व नम्बर एक स्वाएटेकले चेक गणतन्त्रकी क्यारोलिना मुचोभालाई २–१ ले हराउँदै उपाधि जितेकी हुन् । उनले पछिल्लो चार वर्षमा तेस्रो पटक उपाधि जितेकी हुन् ।

रोमाञ्चक फाइनलमा खेलमा २२ वर्षीया स्वाएटेकले मुचोभालाई ६–२, ५–७, ६–४ को स्कोरमा हराएकी हुन् । स्वाएटेकको समग्रमा यो चौथो ग्रान्डस्लाम उपाधि हो । फ्रेन्च ओपनबाहेक स्वाएटेकले गत यूएस ओपनको उपाधि जितेकी थिइन् ।

गतवर्ष अप्रिलमा विश्व नम्बर एक बनेपछि स्विटेकले २६ ग्रान्डस्लाम खेलमध्ये दुई मात्रै हारेकीछिन् । गएरातिको जितसँगै फ्रेन्च ओपनमा स्वाएटेक सन् १९९०–९२ मा मोनिका सेलेसपछि लगातार उपाधि जित्ने सबैभन्दा कान्छी महिला खेलाडी बनेकी छिन् ।

“सबैभन्दा पहिले क्यारोलिना मुचोभालाई बधाई छ,” स्वाएटेकले भनिन् । स्वाएटेक २००७ मा जस्टिन हेनिन पछि फ्रेन्च ओपनको उपाधि रक्षा गर्ने पहिलो महिला खेलाडी बनेकी छिन् ।

“मलाई थाहा थियो कि आज एक कठिन खेल हुनेछ । मलाई आशा छ कि मुचोभाले अझै धेरै फाइनल खेल्न जाँदै हुनुहुन्छ । तपाईको टिमलाई बधाई छ । मलाई थाहा छ टिम कति महत्त्वपूर्ण छन् भनेर । मेरो टिम बिना म यहाँ आउन सक्दिँन,’’ स्वाएटेकले थपिन्, “मेरो टिमलाई अन्तिम समयसम्म यस्तो पीडा भएकोमा माफी चाहन्छु .... । आगामी दिनमा अझ राम्रो गर्ने प्रयास गर्नेछु । मलाई थाहा छ हामीले यो प्रतियोगिता जित्यौं । तर यो सजिलो थिएन । दुई साताको यो भ्रमण निकै गाह्रो भयो । मेरो टिमलाई धन्यवाद । मेरो परिवार तथा पोल्याण्डबाट आएका सबैप्रति आभारी छु । र, फ्रान्सका सबै समर्थकलाई धन्यवाद । योमेरो मनपर्ने ठाउँ पनि हो ।’’

२६ वर्षीया मुचोभाले सेमिफाइनलमा दोस्रो वरीयताप्राप्त आर्यना साबलेन्कालाई स्तब्ध बनाउँदै फाइनलमा स्थान बनाएकी थिइन् । मुचोभाले अष्ट्रेलियन ओपन विजेता साबलेन्कालाई २–१ को सेटमा हराउँदै फाइनलमा स्थान बनाएकी थिइन् । तर, फाइनलमा स्वाएटेकलाई रोक्न भने मुचोभा असफल भइन् ।

“म थोरै मात्र बोल्छु । किनभने यो अलि भावनात्मक छ,’’ मुचोभाले आँसु बगाउँदै भनिन्, “उपाधिबाट अहिलेसम्म नै धेरै नजिक थिए । तर मैले एक उत्कृष्ट खेल खेलेँ । इगा, म तपाईलाई फेरि ठूलो स्वरमा बधाई दिन चाहन्छु र तपाईंको टोलीलाई बधाई ।मेरो बक्सबाट जब म मानिसहरूलाई हेर्छु । मलाई लाग्छ कि म विजेता हुँ । धन्यवाद । म आशा गर्छु कि यो सुरुआत मात्र हो । हामीले धेरै लामो यात्रा गर्न बाँकी छ ।’’