काठमाडौं । साविक विजेता इगा स्वाएटेक र विम्बल्डन विजेता रिबाकिनाले बिहीबार राति फ्रेन्च ओपनको तेस्रो चरणमा स्थान बनाउन सफल भएका छन् । 

विश्व नम्बर एक पोल्यान्डकी स्वाएटेक फ्रेन्च ओपनमा पछिल्लो चार वर्षमा तेस्रो उपाधि जित्ने लक्ष्यमा छिन् । उनले दोस्रो चरणमा अमेरिकाकी क्लाइर लिउमाथि ६–४, ६–० को सहज जित दर्ता गरेकी हुन् । स्वाएटेकले अब चीनकी वाङ सिउविरुद्ध प्रतिस्पर्धा गर्नेछिन् । २१ वर्षिया सिउले स्विडेनकी २७ वर्षिया रेबेक्का पिटरसनलाई ७–६(७/५), ६–२ को स्कोरमा हराउँदै तेस्रो चरणमा स्थान बनाउन सफल भएकी हुन् । 

गतसाता इटालियन ओपनको उपाधि जित्न सफल काजकिस्तानकी रिबाकिनाले दोस्रो चरणमा चेक गणतन्त्रकी लिन्डा नोसकोभालाई २–० को सोझो सेटमा हराउँदै तेस्रो चरणमा स्थान बनाएकी हुन् । चौथो वरीयताप्राप्त २३ वर्षिया रिबाकिनाले १८ वर्षिया नोसकोभालाई  ६–३, ६–३ को स्कोरमा हराएकी हुन् । 

रिबाकिनाले अब स्पेनकी सारा सोरिबस टोर्मोसँग प्रतिस्पर्धा गर्नेछिन् । टोर्मोले क्रोएसियाकी पेट्रा मार्टिकलाई ६–४, ६–१ को स्कोरमा हराउँदै तेस्रो चरणमा स्थान बनाउन सफल भएकी हुन् । 

फ्रेन्च ओपनमा स्वाएटेक र रिबाकिनासँगै दोस्रो वरीयतामा रहन सफल बेलारुसकी आर्यना साबलेन्कालाई प्रमुख उपाधि दाबेदारका रुपमा लिइएको छ । यी तीन जनाले पछिल्लो चार ग्राण्डस्लामको उपाधि एक आपसमा बाडेका छन् । 

फ्रेन्च ओपनमा गएराति छैटौँ वरीयताप्राप्त अमेरिकाकी कोको गाउफले पनि सोझो सेटमा विजय हासिल गर्दै तेस्रो चरणमा स्थान बनाएकी छिन् । १९ वर्षिया गाउफले अष्ट्रियाकी जुलिया ग्राभरलाई ६–२, ६–३ को सहज नतिजामा हराउँदै तेस्रो चरणमा स्थान बनाएकी हुन् । गाउफले अब रुसकी १६ वर्षिया मिरा आन्द्रेभासँग प्रतिस्पर्धा गर्नेछिन् । 

आन्द्रेभाले फ्रान्सकी डियान पारेलाई ६–१, ६–२ को स्कोरमा हराएकी थिइन् । यससँगै आन्द्रेभा फ्रेन्च ओपनको तेस्रो चरण पुग्ने सातौँ १७ वर्षभन्दा कम उमेरको खेलाडी बन्न सफल भएकी छिन् । त्यसमध्ये तीन खेलाडी इभा माजोली, मार्टिना हिङ्गिस र सेरेना विलियम्सले फाइनलसम्मको यात्रा तय गरेका थिए । 

ट्युनेसियाकी ओन्स जाबेउरले पनि सोझो सेटमा विजय हासिल गर्दै तेस्रो चरणमा स्थान बनाएकी छिन् । सातौँ वरीयताप्राप्त २८ वर्षिया जाबेउरले फ्रान्सकी २६ वर्षिया ओसियन डोडिनलाई ६–२, ६–३ को स्कोरमा हराएकी हुन् । जाबेउरले अब सर्वियाकी ओल्गा ड्यानिलोभिकसँग प्रतिस्पर्धा गर्नेछिन् । २२ वर्षिया ड्यानिलोभिकले इटालीकी २७ वर्षिया ज्यासमिन पाओलिनीलाई ६–२, ७–५ को स्कोरमा हराएकी थिइन् । 

अमेरिकाकी केला डेले आफ्नै देशकी २०औँ वरीयताप्राप्त म्याडिसन किसलाई ६–२, ४–६, ६–४ को स्कोरमा हराउँदै तेस्रो चरणमा स्थान बनाइन् । २३ वर्षिया डेले अब स्लोभाकियाकी अन्ना क्यारोलिना स्मेडलोभासँग प्रतिस्पर्धा गर्नेछिन् । त्यस्तै १४औँ वरीयताप्राप्त ब्राजिलकी बिएट्रिज हाडेड माइयाले रुसकी डिएना स्नाइडरलाई ६–२, ५–७, ६–४ को स्कोरमा हराउँदै तेस्रो चरणमा स्थान बनाइन् । उनले अब रुसकी २८ वर्षिया एकातेरिना एलेक्जान्द्रोभासँग प्रतिस्पर्धा गर्नेछिन् ।