काठमाडौं । सहिद स्मारक 'ए' डिभिजन लिगका १० क्लबहरूले खेलाडी फुकुवा नगर्ने घोषणा गरेपछि नेपाली राष्ट्रिय फुटबल टोलीको बन्द प्रशिक्षण स्थगित भएको छ ।

बिहीबार १० क्लबले लिग समाप्त नहुँदासम्म खेलाडी नछोड्ने बताएपछि अखिल नेपाल फुटबल संघ (एन्फा)ले एक विज्ञप्ति जारी गर्दै राष्ट्रिय टोलीको बन्द प्रशिक्षण स्थगित गरिएको जनाएको हो ।

साफ च्याम्पियनसिप र त्यसअघि फिलिपिन्ससँगको मैत्रीपूर्ण खेलका लागि निर्धारित तालिकाअनुसार शुक्रबारदेखि दशरथ रंगशालामा टोलीको प्रशिक्षण हुने तालिका थियो ।

बिहीबार नै कुपन्डोलस्थित फ्रेन्ड्स क्लबको भवनमा लिगका १० क्लबहरूको प्रतिनिधिसहित बसेको बैठकले लिग जारी रहँदा पनि खेलाडीलाई राष्ट्रिय टिमको बन्द प्रशिक्षणमा बोलाएको भन्दै लिग समाप्त नहुँदासम्म नपठाउने निर्णय गरेका थिए ।

क्लबहरूले अखिल नेपाल फुटबल संघ (एन्फा)लाई पुरानो तयारी खर्च, दोस्रो किस्ता, म्याच मनी र म्यान अफ दी म्याचको रकम उपलब्ध गराउन ताकेता गर्दा रकम नआएको भन्दै जेठ १९ गतेदेखि रकम नआउन्जेल विरोध स्वरुप खेलाडी र पदाधिकारीहरूले कालो पट्टी लगाएर लिगको खेलहरू खेल्ने निर्णयसमेत गरेका थिए ।

कुपन्डोलमा यी निर्णय हुँदा लिगका फ्रेन्ड्स क्लब, मनाङ मर्स्याङ्दी क्लब, संकटा क्लब, हिमालयन शेर्पा क्लब, एनआरटी क्लब, फुटबल क्लब खुमलटार, सातदोबाटो युथ क्लब, मछिन्द्र क्लब, चर्च ब्वाइज युनाइटेड र थ्री स्टार क्लबको प्रतिनिधि उपस्थित थिए ।