काठमाडौं । सुर्तीजन्य पदार्थको कुलत हटाउन चाहने व्यक्तिहरूका लागि वीर अस्पतालमा निःशुल्क ‘निकोटिन रिप्लेसमेन्ट थेरापी’ सेवा सुरु गरिएको छ । बुधवार (हिजो)देखि यो सेवा सुरु गरिएको हो ।

सो सेवाअन्तर्गत सुर्तीजन्य पदार्थको कुलत छोड्न चाहनेलाई निःशुल्क परामर्श तथा निकोटिन गम (चुइङ ट्याबलेट) उपलब्ध गराइने अस्पतालले जनाएको छ ।

निकोटिन रिप्लेसमेन्ट थेरापी सेवाका लागि लागि मुख तथा दन्त विभाग, क्यान्सर रोग, छाती रोगलगायत विभिन्न विभागबाट विशेषज्ञ चिकित्सकहरू सहभागी हुनेछन् ।

निकोटिन रिप्लेसमेन्ट थेरापी सुर्तीजन्य पदार्थको कुलत छुटाउन विभिन्न देशहरूमा प्रयोग हुँदै आएको प्रभावकारी पद्धति हो । नेपालमा भने यो सेवा पहिलोपटक वीर अस्पतालबाट सुरु गरिएको हो । यसका लागि विश्व स्वास्थ्य संगठनको सहयोग रहेको अस्पतालले जनाएको छ ।