काठमाडौं । पाँचौँ वरीयताप्राप्त क्यारोलिन गार्सिया फ्रेन्च ओपनको दोस्रो चरणबाटै बाहिरिएकी छन् । दोस्रो वरीयताकी आर्यना साबलेन्काले तेस्रो चरणमा स्थान बनाउँदा लेलह फर्नान्डेज पनि दोस्रो चरणबाटै बाहिरिइन् ।
घरेलु कोर्टमा दाबेदार मानिएकी गार्सिया रुसकी अन्ना ब्लिनकोभासँग ४–६, ६–३ र ७–५ को स्कोरमा पराजित भएकी हुन् । विजयी ब्लिनकोभाले अब युक्रेनकी स्भितोलिनाविरुद्ध प्रतिस्पर्धा गर्नेछिन् । स्भितोलिनाले अष्ट्रेलियाकी स्टोर्म हन्टरलाई २–६, ६–३ र ६–१ को स्कोरमा हराइन् ।
दोस्रो वरीयाताकी सबालेन्काले आफ्नै देशकी आर्यना शेमानोभिचलाई ७–५ र ६–२ को स्कोरमा पराजित गरिन् । आर्यनाले अब रुसकी कामिला राखिमोभाविरुद्ध प्रतिस्पर्धा गर्नेछिन् । राखिमोभाले पोल्यान्डकी मागडालेना फ्रेचलाई ६–३ र ६–४ को स्कोरमा हराएकी थिइन् ।
सन् २०१७ को विजेता जेलेना ओस्टापेन्का अमेरिकाकी पेटन स्टर्नससँग ३–६, ६–१ र २–६ को स्कोरमा पारजित भइन् । स्टर्नले गत वर्ष यूएस ओपनबाट ग्रान्डस्लाममा डेब्यु गरेकी थिइन् । देशबाहिर स्टर्नले खेलेको यो पहिलो ग्रान्डस्लाम प्रतियोगिता हो । उनले अब नवौँ वरीयताप्राप्त डारिया कासतकिनाविरुद्ध प्रतिस्पर्धा गर्नेछिन् । रुसकी कासतकिनाले मार्केटा भोन्द्रोउसोभालाई ६–३ र ६–४ को स्कोरमा पारजित गरेकी हुन् ।
तेस्रो वरीयताप्राप्त जोसिका पेगुलाले इटालीकी कामिला जियोर्गीलाई हराउँदै तेस्रो चरणमा स्थान बनाइन् । पेगुलाले पहिलो सेट ६–२ ले जितेकी थिइन् । दोस्रो सेटमा चोटका कारण जियोर्गीले नखेल्ने भएपछि पेगुलाले तेस्रो चरणमा स्थान बनाएकी हुन् । अमेरिकाकी पेगुलाले अब २८औँ वरीयताप्राप्त बेल्जियमकी इलिस मार्टेन्सविद्ध प्रतिस्पर्धा गर्नेछिन् । मार्टेन्सले कोलम्बियाकी कामिला आसोरियोलाई ६–३ र ७–६ (७र्३) को स्कोरमा हराइन् ।
२०२१ को यूएस ओपन उपविजेता २० वर्षीया फर्नान्डेज डेनमार्ककी क्लारा टौसनसँग ३–६, ७–५ र ४–६ को सेटमा पराजित भइन् । विजयी टौसनले अब रुसकी एलिना अभानेस्यनविरुद्ध प्रतिस्पर्धा गर्नेछिन् । २० वर्षीया अभानेस्यनले फ्रान्सकी लियोलिया जेनजेनलाई ६–० र ७–५ को स्कोरमा हराएकी हुन् ।
