काठमाडौं । विश्व नम्बर एक कार्लोस अल्कारेज र तेस्रो वरीयताप्राप्त नोभाक जोकोभिच फ्रेन्च ओपनको तेस्रो चरणमा स्थान बनाउन सफल भएका छन् ।

पुरुष टेनिसमा कीर्तिमानी २३औँ ग्रान्डस्लाम उपाधि जित्ने लक्ष्यमा रहेका सर्वियाका जोकोभिचले हंगेरीका मार्टोन फुकसोभिक्सलाई ७–६ (७/२), ६–० र ६–३ को स्कोरमा हराउँदै तेस्रो चरणमा स्थान बनाएका हुन् । ३६ वर्षीय जोकोभिचले अब स्पेनका एलेजान्द्रो डेभिडोभिच फोकिनाविरुद्ध प्रतिस्पर्धा गर्नेछन् । फोकिनाले दोस्रो चरणमा फ्रान्सका लुका भान एस्चेलाई ६–४, ६–३ र ७–६ (८/६) को स्कोरमा हराएका हुन् ।

विश्व नम्बर एक स्पेनका अल्कारेजले जपानका तारो ड्नियललााई हराउन चार सेटसम्म खेल्नुपरेको थियो । २० वर्षीय अल्कारेजले ड्नियललाई ६–१, ३–६, ६–१ र ६–२ को सेटमा हराएका हुन् । गत वर्ष यूएस ओपनको उपाधि जितेका अल्कारेजलाई फ्रेन्च ओपनको प्रमुख दाबेदारमध्ये एक मानिएको छ ।

अल्कारेजले अब तेस्रो चरणमा क्यानडाका डेनिस शापोभालोभविरुद्ध प्रतिस्पर्धा गर्नेछन् । शापोभालोभले इटालीका माटेयो अर्नाल्दीलाई ६–२, ३–६, ६–३ र ६–३ को स्कोरमा हराउँदै तेस्रो चरणमा स्थान बनाएका हुन् ।

पाँचौँ वरीयताका स्टेफानो सिट्सिपसले तेस्रो चरणमा अर्जेन्टिनाका डिएगो स्वार्ट्जमनसँग प्रतिस्पर्धा गर्ने भएका छन् । सन् २०२१ का उपविजेता ग्रिसका सिट्सिपसले स्पेनका रोबर्टो कार्बालेस बाइनालाई ६–३, ७–६ (७–४) र ६–२ को स्कोरमा हराउँदै तेस्रो चरणमा स्थान बनाएका हुन् । स्वार्ट्जमनले पोर्चुगलका नुनो बोर्गेसलाई ७–६ (७/३), ६–४ र ६–३ को स्कोरमा हराउँदै तेस्रो चरणमा स्थान बनाएका हुन् ।

सातौँ वरीयताप्राप्त रुसका आन्द्रे रुबलेभले फ्रान्सका कोरेन्टिन माउटेटलाई ६–४, ६–२, ३–६ र ६–३ स्कोरमा हराउँदै तेस्रो चरणमा स्थान बनाएका हुन् । रुबलेभले अब तेस्रो चरणमा इटालीका लोरेन्जो सोनेगोविरुद्ध प्रतिस्पर्धा गर्नेछन् । सोनेगोले फ्रान्साका उगो हम्बर्टलाई ६–४, ६–३ र ७–६ (७/३) को स्कोरमा हराएका थिए ।

११औँ वरीयताका कारेन खाचनोभले मोल्डोभाका राडु अल्बर्टलाई ६–३, ६–४ र ६–२ को स्कोरमा हराउँदै तेस्रो चरणमा स्थान बनाए । उनले अब अष्ट्रेलियाका थानसी कोक्किनाकिसविरुद्ध प्रतिस्पर्धा गर्नेछन् । कोक्किनाकिसले स्वीट्जरल्यान्डका स्टेन वावरेन्कालाई ३–६, ७–५, ६–३, ६–७ (४/७) र ६–३ को स्कोरमा हराएका हुन् ।

१३औँ वरीयाताका हबर्ट हुर्काजले नेदरल्यान्ड्सका टलन ग्रिक्सपूरलाई ६–३, ५–७, ६–७ (१५/१३), ७–६ (७/५), र ६–४ को स्कोरमा हराउँदै तेस्रो चरणमा स्थान बनाए । उनले अब पेरुका युवान पाब्लो भरिलसविरुद्ध प्रतिस्पर्धा गर्नेछन् । भरिलसले १९औँ वरीयताप्राप्त स्पेनका रोबर्टो बौटिस्टालाई १–६, ४–६, ६–३, ६–१ र ६–१ को स्कोरमा हराएका हुन् ।

इटालीका फाबियो फोगनिनिले अष्ट्रेलियाका जसन कुबलेरलाई ६–४, ७–६ (७/५) र ६–२ को स्कोरमा हराएका हुन् । फोगनिनिले अष्ट्रियाका सेबास्टिन ओफ्नरविरुद्ध प्रतिस्पर्धा गर्नेछन् । ओफ्नरले अब २४औँ वरीयताप्राप्त अमेरिकाका सेबास्टिएन कोर्डालाई ६–३, ७–६(७/२) र ६–४ को स्कोरमा हराएका हुन् ।