काठमाडौं । इङ्लिस प्रिमियर लिगमा अन्तिम चरणको खेल बाँकी हुँदा विजेता र शीर्ष चारमा रहेर यूईएफए च्याम्पियन्स लिग खेल्ने टिमको टुंगो लागिसकेको थियो । तर, शीर्ष स्थानमा मध्यम स्थान र रेलिगेशन क्षेत्रमा भने रोमाञ्चक भिडन्त भएको थियो । 

अन्तिम खेल भएका कारण सबै खेल एकै समयमा भएका थिए । अन्तिम खेलमा एभर्टनले बर्नमाउथमाथि १–० को नतिजा निकाल्दा लेस्टर सिटी र लिड्स युनाइटेड भने रेलिगेशनमा परेका छन् । लेस्टरले वेष्ट ह्याममाथि २–१ को नतिजा निकाले पनि रेलिगेशन टार्न सकेन । 

२०१६ को विजेता लेस्टरलाई आफूले जितेर मात्र पुग्दैनथ्यो । एभर्टन पनि पराजित हुनुपथ्र्यो । तर, एभर्टनले जितेपछि लेस्टरको रेलिगेशन हुन बाध्य बन्यो । २०१४ मा प्रिमियर लिगमा उक्लिएको लेस्टरले २०१६ मा अप्रत्यासित रूपमा लिग उपाधि उचालेको थियो । तर, नौ वर्षको बसाईपछि पुनः रेलिगेशनमा परेको छ । 

मध्यान्तरसम्म एभर्टनले गोलरहित बराबरीमा थियो भने लेस्टरले वेष्ट ह्यामविरुद्ध १–० को अग्रता लिएको थियो । त्यसकारण मध्यान्तरसम्म एभर्टन ६९ वर्षपछि रेलिगेशनमा पर्ने सम्भावना बढेको थियो । तर, ५७औं मिनेटमा अब्दुलाए डौकोरले गोल गरेपछि एभर्टन रेलिगेशनबाट जोगियो । 

गुडिसन पार्कमा अन्तिम सिटी बजेपछि एभर्टनका समर्थक मैदानमै उत्रिएर खुसी मनाएका थिए । मैदान निलो पटका र धुवाले रंगिएको थियो । 

“बल्ल केही राहत भयो । यो मेरो करिअरकै सबैभन्दा कठिन सिजन रह्यो । मानसिक रूपमा धेरै कठिन थियो,’’ एभर्टनका रक्षक कोनोर कोडीले भने, “स्थिति हाम्रो हातमा थियो । तर, हामीले यसलाई साझा विषयवस्तु बनाउन सकेनौं । हामीले बालुवामा रेखा कोर्नु पर्छ । र, यो क्लबले सुधार गर्नुपर्छ किनभने यो विशाल छ ।’’

अन्तिम दिन पनि रेलिगेशनबाट संघर्ष गरेको लिड्स युनाइटेड भने टोटनहमसँग ४–१ ले पराजित भयो । टोटनहमको जितमा ह्यारी केनले दुई गोल गरे भने पेड्रो पोरो र लुकास मौराले एक÷एक गोल गरे । 

जितपछि एभर्टनले ३६ अंक जोड्यो । रेलिगेशनमा पर्ने लेस्टरको ३४, लिड्सको ३१ र साउथह्याम्पटनको २५ अंक छ । साउथह्याम्पटन यसअघि नै रेलिगेशनमा पर्ने निश्चित थियो । अन्तिम दिन साउथह्याम्पटनले लिभरपुलसँग ४–४ को बराबरी खेल्यो । 

लिभरपुल र ब्राइटनले युरोपा लिग खेल्ने, एष्टन भिल्ला युरोपा कन्फेरेन्समा 

एष्टन भिल्लाले गएराति ब्राइटनलाई २–१ ले हराउँदै अर्को सिजन यूईएफए युरोपा कन्फेरेन्स लिग खेल्ने पक्का भएको छ । एष्टन भिल्लाको जितले टोटनहम भने युरोपियन लिग खेल्नबाट बञ्चित भएको छ । 

एष्टन भिल्लाको जितमा डौगलस लुइसले आठौँ र ओलि वाटकिन्सले २६औँ मिनेटमा गोल गरे । ब्राइटनका डेनिज उन्डभले ३८औँ मिनेटमा गरेका थिए । 

जितसँगै युनाई इमिरेको एष्टन भिल्लाले ६१ अंक जोडेर सातौँ स्थानमा रह्यो । यससँगै एष्टन भिल्लाले युरोपा कन्फेरेन्स लिगमा स्थान पक्का गरेको हो । पराजित भए पनि ब्राइटनले ६२ अंक जोड्दै छैटौँ स्थानमा रहेर युरोपा लिगमा स्थान पक्का गरेको हो । ६० अंक जोडेको टोटनहम भने युरोपियन प्रतियोगिता खेल्नबाट बञ्चित भयो । 

टोटनहमले रेलिगेशन क्षेत्रमा रहेको लिड्स युनाइटेडलाई ४–१ ले हराएको थियो । त्यस्तै लिभरपुलले पाँचौँ स्थानमा रहेर युरोपा लिग पक्का गरेको छ । लिभरपुलले गएराति रेलिगेशनमा परेको साउथह्याम्पटनसँग ४–४ को बराबरी खेलेको थियो । 

लिग विजेता सिटी पराजित 
यसअघि नै लिग उपाधि पक्का गरिसकेको विजेता सिटी भने अन्तिम खेलमा ब्रेन्टफोर्डसँग १–० ले पराजित भयो । घरेलु टोली ब्रेन्टफोर्डको जितमा इथन पिनोकले ८५औँ मिनेटमा गरेको गोल निर्णायक बन्यो । सिटीले ८९ अंकका साथ शीर्ष स्थानमा लिग अन्त्य गर्यो । 

विजयी ब्रेन्टफोर्ड ५९ अंक जोडेर नवौँ स्थानमा रह्यो । दोस्रो स्थानमा रहेको आर्सनलले अन्तिम खेलमा उल्भरह्याम्पटनमाथि ५–० को सानदार जितसँगै लिगको अन्त्य गर्यो । पराजित उल्भरह्याम्पटन ४१ अंकका साथ १३औँ स्थानमा रह्यो । 

तेस्रो स्थानमा रहन सफल म्यानचेस्टर युनाइटेडले फुलहमलाई २–१ ले हरायो । युनाइटेडले ७५ अंक जोड्यो । ७१ अंकका साथ चौथो स्थानमा रहन सफल न्युक्यासल युनाइटेडले चेल्सीसँग १–१ को बराबरी खेल्यो । 

चेल्सी भने ४४ अंकका साथ ११औँ स्थानमा रह्यो । ११औँ स्थानको क्रिष्टल प्यालेस र १६औँ स्थानको नटिङ्घम फरेष्टले १–१ को बराबरी खेले ।