काठमाडौं । प्रतिनिधिसभाको शुक्रबारको बैठकमा पशुपतिमा लगाइएको जलहरीको विषयले विवाद भएसँगै बैठक अवरोध भएको छ । 

नेकपा (माओवादी केन्द्र)का सांसद लेखनाथ दाहालले बुधबारको बैठकमा पशुपतिनाथ मन्दिरमा सुनको जलहरीको ठाउँमा पित्तल राखेको आरोप लगाएका थिए । आरोप लगाएको दिन नेकपा (एमाले)का सांसद्हरुले नियमापत्ति भने गरेका थिएनन् ।

शुक्रबार प्रधानमन्त्री पुष्पकमल दाहाल ‘प्रचण्ड’ले वार्षिक नीति तथा कार्यक्रममा सांसदहरुले उठाएको जवाफ दिने कार्यक्रम थियो । शुक्रबार नै प्रतिनिधिसभाबाट नीति तथा कार्यक्रम पास गर्ने सूची थियो ।

प्रतिनिधिसभाको बैठक समयमा सुरु भएन भने एमाले सांसद्को विरोधको कारण स्थगित समेत भएको छ ।

पशुपतिनाथ मन्दिरमा सुनको जलहरी लगाउने काम एमाले अध्यक्ष केपी शर्मा ओली प्रधानमन्त्री भएको बेला भएको थियो । त्यो बेला नै यो विषयमा विवाद भएको थियो ।

महालेखा परीक्षकको ५९औँ प्रतिवेदनमा पशुपतिनाथमा जलहरी लगाउने बेला सुनको एकिन विवरण नआएको विषय उल्लेख छ ।

पशुपति मन्दिरको शिवलिंगको गर्भगृहलाई पूर्ण रुपले ढाक्ने गरेर १०३ किलो ७७३ ग्राम सुन ८० करोड ११ हजारमा खरिद भएको महालेखाको प्रतिवेदनमा उल्लेख छ । जसमा शुद्ध तामा दुई किलो ८९० ग्राम, चाँदी एक किलो २४९ ग्राम, जिंग १२.७५ ग्राम प्रयोगसहित १०७ किलो ९२४.७५ ग्राम सुन कायम भएको उल्लेख छ ।

“निर्मित जलहरी, जलधारा, नागमूर्ति, सुनको किलालगायतमा प्रयोग भएको सुनको तौल ९६ किलो ८८२२ ग्राम रहेको बाँकी सुन १० किलो ९७६ ग्राम रिंग बनाएर जलहरीमा प्रयोग गरेको उल्लेख छ । रिंग बनाउनको लागि सात करोड ८६ लाख ४६ हजार रहेको छ ।

जलहरी बनाएर बाँकी रहेको सो सुनको सम्पूर्ण परिणाम रिंग बनाउने काममा पुष्टि हुने विवरण पेस भएको छैन,” महालेखाको प्रतिवेदनमा भनिएको छ ।

तत्कालीन राष्ट्रपति विद्यादेवी भण्डारीले जलहरी राख्ने काम गरेकी थिइन् । जलहरी निर्माणको लागि नेपाली सेना खटिएको थियो ।