काठमाडौं । दुई दिनयता काठमाडौंको माइतीघरमा नर्सहरूको एक समूह शान्तिपूर्ण धर्नामा छ । पछिल्लो एउटा घटनाले समग्र नर्सिङ पेशामाथि नै प्रश्न उब्जाएकोमा उनीहरूको आपत्ति छ ।

सामाजिक सञ्जालमार्फत् नर्सहरूको चरित्रहत्या भएको भन्दै त्यसको विरोध जनाइरहेका छन् । घटनाले नर्सिङ पेसाप्रति नै आँच पुर्‍याएको नर्स सम्वद्ध विभिन्न संघ संस्थाहरूको ठहर छ । यही घटनाले अहिले अस्पतालदेखि सडकसम्म तताएको छ ।

के हो घटना ?
बिपी कोइराला मेमोरियल क्यान्सर अस्पताल (भरतपुर क्यान्सर अस्पताल) मा कास्कीकी १६ वर्षीया बालिका रक्त क्यान्सरको उपचार गराइरहेकी छिन् । उनलाई आर्थिक सहयोग जुटाइरहेकी थिइन् सामाजिक अभियान्ता गिभिना मगरले ।

जेठ ३ गते बेलुका गिभिनाको टिकटक आइडी गिभिना १८ (जुन अहिले चलिरहेको छैन) बाट एउटा भिडियो पोष्ट भयो, जसमा तिनै बालिकाबारे गिभिना र भरतपुर अस्पतालका नर्सहरूबीच भएको सामान्य विवाद देखाइएको छ ।

गिभिनाले सो भिडियोमा बालिकालाई २ बजे दिनुपर्ने औषधि ४ः ३० बजे दिएर अस्पतालका नर्सहरूले बिरामीको उपचारमा लापरबाही गरेको बताएकी छन् । औषधि दिएको समय भने २ बजे नै भनेर उल्लेख गरेको उनले भनेकी छिन् ।

तर, इमर्जेन्सी केयर युनिटका नर्सहरूले भने केही ढिलो गरेर दिएको औषधिले खासै फरक नपर्ने भन्दै बुझाउन खोजेको भिडियोमा देखिन्छ । संवादको क्रममा केही विवाद भएको भिडियोमा देखिन्छ ।

यो भिडियो टिकटकमा सार्वजनिक भएसँगै विभिन्न खाले प्रतिक्रियाको ओइरो लाग्यो । गत जेठ ४ गते बिहान भरतपुर अस्पताल प्रशासनले गिभिनालाई बोलाई यसबारे छलफल ग¥यो । गिभिनासँग सम्बन्धित नर्स, अस्पताल प्रशासन, नर्सिङ विभागसमेत बसेर डेढ घण्टा लामो वार्ता चल्यो ।

दुवै पक्षले आफ्नो गल्ती स्वीकार गरी अघि बढ्ने अस्पतालको संवेदनशील क्षेत्रमा खिचिएको भिडियो टिकटकबाट हटाउने र आगामी दिनमा यो विवादलाई नलम्ब्याउने सहमति भयो ।

गिभिनाको टिकटकबाट पुरानो भिडियो हटेछ तर अन्य प्रयोगकर्ताले सेभ गरेर पोष्ट गरेको भिडियो भने अहिले पनि टिकटक र फेसबुकमा छ्यापछ्याप्ति छ ।

त्यतिमात्र नभई गिभिनाले अस्पतालबाहिर निस्किएर टिकटक लाइभमार्फत् नर्सहरूलाई गाली गरेको र चरित्रहत्या हुने शब्दहरू बोलेर भिडियो पोष्ट गरेको अस्पतालको आरोप छ ।

त्यसपछि भने टिकटक र फेसबुकमार्फत् नर्सहरूबारे नकारात्मक टिप्पणी र प्रतिक्रियाको ओइरो लाग्छ । घटनालाई सतही रूपमा बुझी दूस्प्रचार गरिएको र सामाजिक सञ्जालमार्फत् आफूहरूको चरित्र हत्या भएको भन्दै भरतपुर अस्पतालका ५० जना नर्सको टोली जेठ ७ गते जिल्ला प्रशासन कार्यालय पुगे कारबाही प्रक्रियबारे छलफल भयो ।

तर, नर्सको टोली अस्पताल फर्कन नपाउँदै गिभिना र उनका समर्थकहरूको टोलीसँग जम्काभेट भयो, दुवैतर्फीले आ–आफ्ना तर्क राख्दै विवाद गरेको भिडियो अहिले सामाजिक सञ्जालमा भाइरल भइरहेको छ ।

भिडियोमा गिभिनाका समर्थकहरूले नर्सहरुको बोली व्यवहारलाई लिएर आक्रामक शैलीमा प्रस्तुत भएको र नर्सहरूले गिभिनालाई मगन्ते, भिखारीजस्ता शब्दले गाली गरेको देखिन्छ ।

भरतपुर क्यान्सर अस्पतालको इमर्जेन्सी केयर युनिटबाट सुरु भएको घटना अहिले सडकसम्म आइपुगेको छ । चितवन र काठमाडौंसँगै विभिन्न जिल्लामा रहेका नर्स सम्वद्ध संघ संगठन अहिले विरोधमा उत्रिएका छन् । एउटा घटनाका कारण समग्र नर्सिङ पेशामाथि नै आँच पुगेको र नर्सहरूको चरित्रहत्या भएको  गुनासो छ ।

यता गिभिनाका समर्थकहरूले भने घटनामा नर्सहरूले एउटा सामाजिक अभियान्तामाथि मगन्तेको आरोप लगाएको, मानहानी गरेको भन्दै विरोध गरिरहेका छन्, घटना जिल्ला प्रहरी कार्यालय चितवनले छानविन गरिरहेको छ ।

गल्ती भए सजायको भोग्न तयार छौँ तर पेशामाथि हमला नगरियोस्
यो घटनाले उग्र रुप लिएपछि आफूहरूको काम गर्ने मनोबल अत्यन्तै कमजोर भएको नर्सहरूले बताएका छन् । भरतपुर क्यान्सर अस्पतालकी नर्सिङ विभाग प्रमुख सबिता पन्थी यही घटनाका कारण पछिल्ला केही दिनयता अस्पतालका नर्सहरूमा मानसिक यातना थपिएको बताउँछिन् ।

“एकातिर साथीहरूलाई काममा जान एकदमै गाह्रो भइरहेको छ, अर्कोतर्फ भिजिटरहरूले नर्सप्रति विश्वसनीयता घटेको महसुस भएको छ, तैपनि अस्पतालमा उपचाररत २८० बिरामीको हेरचाह त गर्नैपर्‍यो,” उनी भन्छिन् ।

“घटनाको छानविन समिति गठन गरियोस्, पेसामाथि हमला नगरियोस्  तर, अन्तर्राष्ट्रिय स्तरमै पेसामाथि प्रश्न उठाउने काम नगरियोस्” उनको भनाइ छ ।