काठमाडौं । फेसबुकको मुख्य कम्पनी मेटालाई युरोपियन आयोग (ईयू)को नियामकले डेढ खर्ब रुपैयाँभन्दा बढी जरिवाना तोकेको छ ।

फेसबुकले ईयू नागरिकको डाटा अमेरिका पठाएर गोपनीयता उल्लंघन गरेको भन्दै १.३ अर्ब अमेरिकी डलर (एक खर्ब ७१ अर्ब रुपैयाँभन्दा बढी) जरिवाना तोकेको हो ।

यो मुद्दा सन् २०१३ देखि नै सतहमा आएको थियो । यस किसिमको अमेरिकी सामूहिक निगरानीको बारेमा एडवर्ड स्नोडेनले खुलासा गरेका थिए ।

गोपनीयता उल्लंघनकै लागि सन् २०२१ मा अमेजनलाई तोकिएका ७४ करोड पाउण्डभन्दा बढी यो कीर्तिमानी जरिवाना हो ।

मेटाले यसरी ईयूका नागरिकको डाटा अमेरिका पठाएर लक्षित विज्ञापन देखाउनका लागि प्रयोग गर्ने गर्छ ।

यसअघि, यस किसिमको डाटा गोपनीयता शिल्ड भनेर चिनिने ट्रान्सएटलान्टिक सम्झौताले स्तानान्तरणका लागि सुरक्षित गरेको थियो । तर ईयूको अदालतले अमेरिकी निगरानीको खतरालाई संकेत गर्दै सन् २०२० मा यसलाई अवैध घोषित गरेको थियो ।

१.३ अर्ब अमेरिकी डलर जरिवाना तोकिए पनि फेसबुकले आफ्नो गोपनीयता नीतिमा खासै फेरबदल गर्ने अपेक्षा भने गरिएको छैन । किनकि, दशौँ अर्ब कमाउने मेटाका लागि यो जरिवाना सामान्य हो ।