काठमाडौं । नेपाली कथानक चलचित्र ‘परस्त्री’का तीनवटा गीत भारतीय गायक÷गायिकाले गाउने भएका छन् । अमित मिश्र, सोनल प्रधान र कुनल गञ्जवालाले गाउने ‘परस्त्री’को गीत गाउने भएका हुन् ।
अमित, सोनल र कुनल तीनैजना बलिउड सिने नगरीमा लोकप्रिय प्लेब्याक सिंगरको छवि बनाएका कलाकार हुन् । निर्देशक सुरज पाण्डेका अनुसार कुनल गञ्जवालाको स्वरमा गीत रेकर्ड भइसकेको छ । अमित र सोनलले गाउन बाँकी छ । उनीहरूले आज गीत रेकर्ड गर्ने निर्देशक सुरजले जानकारी दिए ।
नेपालीमा भने छेतेन क्षेत्री र निकिथा थापाले गीत गाएका छन् । भारतीय सिंगरले गाएका गीत जेठ १६ गते रिलिज गरिने निर्देशक सुरजको भनाइ छ ।
‘परस्त्री’ जुन ३० अर्थात असार १५ गते नेपाल र भारतमा एकसाथ रिलिज हुँदै छ । ‘परस्त्री’ हिन्दी भाषामा डबिङ भइसकेको छ ।
सुरजको निर्देशन रहेको सिनेमाको कथा दीपेन्द्र के खनालले लेखेका छन् । शर्मिला पाण्डेले निर्माण गरेको सिनेमामा कोसिस क्षेत्री, शिल्पा मास्के, गौरव विष्ट, अलिसा क्षेत्री, आशान्त शर्मालगायत कलाकारको अभिनय छ ।
