काठमाडौं । सहिद स्मारक ‘ए’ डिभिजन लिगमा विभागीय टिम त्रिभुवन आर्मी फुटबल क्लब रेलिगेसन क्षेत्रमा संघर्षरत नवप्रवेशी टोली फुटबल क्लब खुमलटारसँग २–२ को बराबरीमा रोकिएको छ ।

शुक्रबार त्रिपुरेश्वरस्थित दशरथ रंगशालामा सम्पन्न खेलमा दुईपटकको अग्रता जोगाउन नसक्दा आर्मी पुछारको खुमलटारसँग अंक बाढ्न बाध्य बन्यो । खेलको १४औँ मिनेटमा जगजित श्रेष्ठले गोल गर्दै आर्मीलाई अग्रता दिलाएका थिए । तर, मेसुके ओलोमेउले ३५औँ मिनेटमा गोल गरेपछि खुमलटार खेलमा फर्किएको थियो । पहिलो हाफमा समान एक गोल गरेका दुवै टिमले दोस्रो हाफमा पनि एक–एक गोल थपे ।

नवयुग श्रेष्ठले ५१औँ मिनेटमा गोल गरेपछि आर्मीले पुनः २–१ को अग्रता बनाएको थियो । तर, ७५औँ मिनेटमा स्टेफाने बिनोङले गोल गरेपछि खुमलटार बराबरीमा फर्कियो ।

बराबरीमा रोकिएसँगै १९ खेलबाट २६ अंक जोडेको आर्मी तालिकाको पाँचौ स्थानमा उक्लिएको छ । समान खेलबाट १८ अंक जोडेको खुमलटार तालिकाको पुछारमा छ ।

लिगमा आजै भएको अर्को खेलमा हिमालयन शेर्पा क्लबले अर्को विभागीय टिम एपीएफ फुटबल क्लबविरुद्ध ३–२ को रोमाञ्चक जित निकाल्यो ।

सातदोबाटोस्थित एन्फा मुख्यालयमा सम्पन्न खेलको सातौँ मिनेटमा खामिर गिल्सेनले गरेको गोलबाट हिमालयन शेर्पाले अग्रता बनाएको थियो । १८औँ मिनेटमा पिस्टोने मुतम्बाले गोल गर्दै हिमालयन शेर्पाको अग्रतालाई दोब्बर पारे । ५१औँ मिनेटमा अबायोमी फाकुल्नेले गोल गरेपछि हिमालयन शेर्पाले अग्रतालाई ३–० मा पुर्‍याएको थियो ।

खेलको अन्तिम समयमा दुई गोल फर्काउँदै खेललाई रोमाञ्चक बनाए पनि एपीएफ बराबरीमा फर्किन भने सकेन । ८७औँ मिनेटमा एपीएफका सनिष श्रेष्ठले गोल गर्दै हिमालयन शेर्पाको अग्रतालाई ३–१ मा झारेका थिए । इन्जुरी समयमा युवराज खड्काले गोल गर्दै एपीएफलाई ३–२ को अवस्थामा ल्याए पनि विभागीय टिमको हार टार्न सकेनन् ।

जितसँगै १९ खेलबाट २५ अंक जोडेको हिमालयन शेर्पा तालिकाको सातौँ स्थानमा उक्लिएको छ । समान खेलबाट २२ अंक जोडेको एपीएफ १२औँ स्थानमा झरेको छ । एपीएफ तालिकाको रेलिगेसन क्षेत्रमा रहेको फ्रेन्ड्स क्लबभन्दा एक अंकमात्र माथि छ ।