काठमाडौं । दोस्रो हाफमा फरवार्ड लाउटारो मार्टिनेजले गरेको गोलमा इन्टर मिलानले मंगलबार राति च्याम्पियन्स लिग सेमिफाइनलको दोस्रो लेगमा सहरी प्रतिद्वन्द्वी एसी मिलानलाई १–० ले पराजित गरेको छ । इन्टरले समग्रमा ३–० को नतिजा निकाल्दै इस्तानबुलमा हुने फाइनलको टिकट पक्का गरेको छ । 

पहिलो लेगमा २–० ले पराजित एसी मिलानले गएराति केही सुधारिएको प्रदर्शन गर्न सफल भएको थियो । तर, सान सिरोमा अर्जेन्टिनाका फरवार्ड मार्टिनेजले ७४औँ मिनेटमा ६ यार्ड बक्स नजिकबाट गरेको सशक्त प्रहारलाई मिलानका गोलकिपर माइक मेननले रोक्न सकेनन् । त्यही गोल इन्टरको जितमा निर्णायक बन्यो । 

इडेन जेको र हेनरिक मिखितारियनले गरेको गोलबाट इन्टरले पहिलो लेगमा २–० को अग्रता लिएको थियो । सग्रममा ३–० को नतिजा निकालेको इटालियन क्लब इन्टर मिलानले अब फाइनलमा म्यानचेस्टर युनाइटेड र रियाल मड्रिडबीचको विजेतासँग प्रतिस्पर्धा गर्नेछ । फाइनल खेल १० जुनमा टर्कीको इस्टानबुलमा हुनेछ । 

इन्टरले नकआउट चरण्मा पोर्चुगलका दुई प्रतिद्वन्द्वी पोर्टो र बेनफिकालाई हराउँदै सेमिफाइनलसम्मको यात्रा तय गरेको थियो । इन्टरले प्रतियोगिताको फाइनलमा स्थान बनाएको यो छैटौँ पटक हो । २००९/१० मा जोजे माउरिन्होको प्रशिक्षणमा उपाधि जितेपछि इन्टरले फाइनलमा स्थान बनाएको यो पहिलोपटक हो । इन्टरले १९६४/६५, १९६३/६४ मा च्याम्पियन्स लिगको उपाधि जितेको थियो । 
 
“यस खेलमा धेरै इतिहास थियो । मैले त्यो महसुस गरेँ । हामीले दुवै लेगमा उत्कृष्ट प्रदर्शन गर्यौँ,’’ गत डिसेम्बरमा अर्जेन्टिनाबाट विश्वकप उपाधि जित्न सफल मार्टिनेजले भने, “हाम्रो टिम एकता राम्रो थियो । यसले हामीलाई उत्प्रेरित गर्यो । मैले यो विश्वकपमा पनि अनुभव गरेको थिएँ । टिम एकता महत्त्वपूर्ण पक्ष हो । यदि तपाईंसँग एकताबद्ध समूह छ भने, सफलता हासिल गर्न सजिलो हुन्छ । हामीले देखायौं कि इन्टर यस क्षणका लागि योग्य छ भनेर ।’’

इन्टरका फरवार्ड मार्टिनेजले थपे, “च्याम्पियन्स लिगको फाइनल खेल्नु एउटा सपना हो । हामीले त्यही लक्ष्यका साथ यो सिजन सुरु गर्यौं र आज हामीले धेरै महत्त्वपूर्ण उपलब्धि हासिल गर्यौंं ।’’

इन्टरका प्रशिक्षक सिमोन इन्जाघीले पहिलो लेगमा खेलेको टिममा कुनै परिवर्तन गरेका थिएनन् । मार्टिनेज र जेकोलाई अग्रपंक्तिको जिम्मेवारी सुम्पिएका थिए । दुवै जनालाई इन्जाघिले इटालियन सिरी ‘ए’मा सासउलोविरुद्ध आरम दिइएको थियो । 

मिलान भने मुख्य फरवार्ड राफेल लिओले पुनरागमन गरेका थिए । तिघ्राको चोटका कारण उनले पहिलो लेग गुमाएका थिए । त्यस्तै एलेक्सिस सेलेमेकर्स र साइमन कजायरको स्थानमा जुनियर मेसिआस र मलिक थियावलाई मौका दिइएको थियो । 

मिलानले गोलका केही अवसर पनि सिर्जना गरेको थियो । ब्राहिम डियाजले पेनाल्टी क्षेत्रबाट हानेको दायाँ बार च्यापेर हानेको प्रहारलाई इन्टरका गोलकिपर आन्द्रे ओनानाले बचाइदिएका थिए । लियोले पनि गोलका स्वर्णिम अवसर खेर फालेका थिए । ३८औं मिनेटमा उनले हानेको प्रहार थोरैले मात्र बाहिरिएको थियो । 

इन्टर मिलान यस प्रतियोगिताको नकआउट चरणमा सहरी प्रतिद्वन्द्वी एसी मिलानलाई हराएको यो पहिलोपटक हो । यसअघि २००२/०३ को सेमिफाइनल र २००४/०५ को क्वार्टरफाइनलमा मिलानले विजयी नतिजा निकालेको थियो । 

एकै सिजन इन्टरले मिलानलाई चार खेलमा हराएको झन्डै ५० वर्षपछि यो पहिलोपटक हो । यसअघि १९७३/७४ मा मात्र यस्तो भएको थियो । इन्टरले च्याम्पियन्स लिगको दुई वटा लेगबाहेक इटालियन सुपर कपमा ३–० तथा सिरी ‘ए’मा १–० को नतिजा निकाल्न सफल भएको थियो । र, मिलानले इन्टरविरुद्ध लगातार चार खेलमा गोल गर्न नसकेको पनि यो पहिलोपटक हो । 

“यो स्पष्ट छ कि हामीले फाइनलको सपना देखेका थियौँ । र, हाम्रा प्रतिद्वन्द्वीहरूलाई हराउन चाहन्थ्यौं,’’ मिलानका प्रशिक्षक स्टेफानो पियोलीले भने, “तर, सफल हुन सकेनौँ । यसले हामीलाई निराश बनाएको छ । अब हामीले लिगमा ध्यान केन्द्रित गर्नुपर्नेछ । शीर्ष चारमा रहेर अर्को सिजन च्याम्पियन्स लिग खेल्न सकेनौँ भने वास्तविक निराशा त्यो हुनेछ ।’’

मिलानले सिरी ‘ए’को पछिल्ला सातमध्ये दुई खेलमा मात्र विजय हासिल गरेको छ । मिलान अहिले ६१ अंकका साथ लिगको पाँचौँ स्थानमा छ । जुन चौथो स्थानको लाजियोभन्दा चार अंकले पछाडि हो । लिगमा अब ९ अंकको खेलमात्र बाँकी छ ।