काठमाडौं । सोमबारको प्रतिनिधिसभा बैठकमा पनि नक्कली भुटानी शरणार्थी प्रकरणमा प्रश्नहरू उठेका छन् । सांसदहरूले प्रधानमन्त्री पुष्पकमल दाहाल प्रचण्ड, नेपाली कांग्रेसका सभापति शेरबहादुर देउवा तथा नेकपा (एमाले)का अध्यक्ष केपी शर्मा ओलीको निरन्तर भेटले यो विषयमा शंका पैदा गरेको जिकिर गरेका छन् ।

बैठकको आकस्मिक समयमा बोल्दै राष्ट्रिय स्वतन्त्र पार्टीका सांसद मनिष झाले दोषीहरूले लुक्ने र मोबाइल फरम्याट गर्ने समय पाइरहेको भन्दै आलोचना गरे ।

“देशद्रोही र भ्रष्टाचारको विषयमा शंकास्पदहरुको नाम आउँछ । उनीहरुलाई आफ्नो मोबाइल फरम्याट गर्ने, लुक्ने, समाचार सुल्झाउने र योजनावद्ध रुपमा सार्वजनिक हुने मौका पाइराखेका छन् । केही त फरार पनि छन रे । यस्तो किन हुन्छ ?” उनले प्रश्न गरे ।

साथै, उनले प्रमुख तीन राजनीतिक दल कांग्रेस, एमाले र माओवादी केन्द्रका शीर्ष नेताहरुले तारन्तर भेटिरहेको भन्दै प्रश्न उठाए ।

बैठकको शून्य समयमा बोल्दै जनता समाजवादी पार्टीका सांसद राजकिशोर यादवले ठूला तीन दलका नेताहरू निरन्तर भेटिरहेको आशंका गरे । उनले यो मिलेमतो त होइन भन्दै प्रश्न उठाए ।

“यो सामान्य भ्रष्टाचार हो भन्ने भाष्य निर्माण गरिँदै छ । यो सामान्य भ्रष्टाचारमात्र होइन, देशद्रोह हो । यसले राजनीतिमा अविश्वासको वातावरण सिर्जना गरिरहेको छ,” उनले भने ।

बैठकको शून्य समयमा बोल्ने सांसदहरू बिजुला रायमाझी, सन्तोष परियार, शिव नेपाली, स्वर्णिम वाग्लेले पनि प्रश्न उठाए । सांसद परियारले त संसद्बाट खेद प्रस्ताव पारित गर्न र भएका प्रगतिहरूको विवरण संसद्मा जानकारी गराउन गृहमन्त्रीसँग आग्रह गरे ।

“नक्कली भुटानी शरणार्थीले राजनीतिलाई लज्जित बनायो । गृहमन्त्रीलाई संसद्मा आएर भएका प्रगतिको जानकारी गराउन माग गर्दछु,” सांसद परियारले भने ।

यस्तै, सांसद माधव सापकोटाले नक्कली भुटानी शरणार्थी प्रकरणलाई विषयान्तर नगर्न आग्रह गरे ।

“मानव तस्करसहितको विषय अगाडि आएको छ । सम्पूर्ण देश केन्द्रित भएर यस विषयमा अगाडि जानुपर्छ । यसलाई विषयान्तर गर्नु भनेको अन्ततः भ्रष्टाचारलाई सघाउ पु¥याउनु हो,” उनले भने ।