काठमाडौं । सहज अग्रता हुँदा खेलको अन्तिम १० मिनेट सम्हालिन नसकेपछि सहिद स्मारक ‘ए’ डिभिजन लिगमा शीर्ष स्थानको जावलाखेल युथ क्लबले मनाङ मस्र्याङ्दीसँग बराबरी खेल्दै अंक बाँडेको छ ।

आइतबार च्यासल रंगशालामा सम्पन्न खेलमा २–० को अग्रता जोगाउन नसक्दा जावलाखेलले शीर्ष स्थानमा तीन अंकको अग्रता बनाउने सुनौलो अवसर गुमायो ।

खेलमा एन्कोटो मोसाबीले ३३औँ मिनेटमा गोल गर्दै जावलाखेललाई अग्रता दिलाएका थिए । ७५औँ मिनेटमा हिसुब थपलियाले गोल गर्दै जावलाखेलको अग्रता दोब्बर पारे । तर, अन्तिम १० मिनेट सम्हालिन नसक्दा जावलाखेलले शीर्ष स्थानमा तीन अंकको अग्रता बनाउने अवसर खेर फाल्यो । विश्व गुरुङले ८०औँ मिनेटमा र सुमित श्रेष्ठले खेलको अन्तिम मिनेटमा गोल गरेपछि मनाङले उत्कृष्ट पुनरागमन गर्दै हार टार्यो ।

बराबरीका बावजुद जावलाखेल युथ क्लब शीर्ष स्थानमा यथावत छ । जावलाखेलले १८ खेलबाट ३१ अंक जोडेको छ । जुन दोस्रो स्थानको चर्च ब्वाइज युनाइटेडभन्दा एक अंक बढी हो । तर, चर्च ब्वाइजले जावलाखेलभन्दा एक खेल कम खेलेको छ ।

यता, १८ खेलबाट २२ अंक जोडेको मनाङ तालिकाको सातौं स्थानमा छ ।

लिगमा आजै सातदोबाटोस्थित एन्फा मुख्यालयमा सम्पन्न खेलमा न्युरोड टिम (एनआरटी) र फ्रेन्ड्स क्बलले २–२ को बराबरी खेल्दै अंक बाँडे ।

खेलको २८औँ मिनेटमा रफिक अमिनुले गोल गर्दै फ्रेन्ड्सलाई अग्रता दिलाएका थिए । यही गोलको सहयोगमा फ्रेन्ड्सले अग्रतालाई पहिलो हाफसम्म कायम राख्यो । तर, ५८औँ मिनेटमा अमित तामाङबाट आत्मघाती गोल भएपछि एनआरटी खेलमा फर्किएको थियो ।

त्यसको आठ मिनेटपछि अमित तामाङले नै गोल गर्दै फ्रेन्ड्सलाई पुनः अग्रतामा राखेका थिए । तर, खेलको निर्धारित समय सकिन एक मिनेट बाँकी रहँदा निकोलस सर्ज सङले गोल गर्दै एनआरटीलाई बराबरीमा फर्काएका थिए ।

बराबरीसँगै १८ खेलबाट २० अंक जोडेको फ्रेन्ड्स लिगको रेलिगेसन क्षेत्रबाट उक्लिएको छ । तर, ११औँ स्थानको फ्रेन्ड्स रेलिगेसन क्षेत्रभन्दा एक अंकमात्र माथि छ । समान खेलबाट २२ अंक जोडेको एनआरटी तालिकाको आठौँ स्थानमा छ ।