काठमाडौं । प्रमुख प्रतिपक्ष दल नेकपा (एमाले)ले नक्कली भुटानी शरणार्थी प्रकरणमा मुछिएका पार्टी सचिव टोपबहादुर रायमाझीलाई अनुसन्धान प्रकृयामा सहयोग गर्न निर्देशन दिएको छ ।

बुधबारको प्रतिनिधिसभा बैठकमा बोल्दै पार्टी उपमहासचिव पृथ्वीसुब्बा गुरुङले पार्टीले रायमाझीलाई निर्देशन दिइसकेको जानकारी दिए । साथै, उनले पार्टी विधिको शासन र कानुनी राज्यको खिलाफ नजाने पनि बताए ।

“हाम्रो पार्टीका माननीय टोपबहादुर रायमाझीलाई हामीले हिजो निर्देशन गरेका छौँ, तपाईँ यो अनुसन्धान र छानबिनमा सहयोग गर्न लाग्नुस्, सहयोग गर्नुस् भनेका छौँ,” उनले भने ।

साथै, उनले अनुसन्धानमा सरकार दायाँबायाँ नहोस् भन्दै दोषीलाई कारबाही गर्न पनि माग गरे ।

“विधिको शासनमाथि विश्वास गर्ने पार्टीको हैसियतले विधिपूर्वक, कानुनपूर्वक जुन खालको अनुसन्धान र छानबिन भइरहेको छ, यसमा सरकार तलमाथि दायाँबायाँ नगरीकन लागोस् । दोषीहरु कोही नछुटुन्, निर्दोष व्यक्ति कोही पनि नपरुन् भन्ने अभियानका साथ लागोस् ।  नेकपा (एमाले) यो सरकारको काममा सहयोग र समर्थन गर्छ,” उनले भने ।