काठमाडौं । सत्तारूढ दल नेपाली कांग्रेसका महामन्त्री गगनकुमार थापाले नक्कली भुटानी शरणार्थीको अनुसन्धान बजार हल्ला र दबाव वा प्रभावले प्रभावित हुन नहुने बताएका छन् ।

बुधबारको प्रतिनिधिसभा बैठकको प्रि–बजेट छलफलमा बोल्दै उनले शीर्ष नेताहरू निरन्तरको भेटले पनि दोषीलाई उन्मुक्ति दिने हो कि भन्ने शंका प्रकट गरे । उनले आफ्नै दलको नेताप्रति इंगित गर्दै नाताको आधारमा पनि दोषीलाई उन्मुक्ति दिन नहुने बताए ।

“अनुसन्धान स्वतन्त्र र निष्पक्ष होस् । निर्दोष कोही पनि नपरोस्, तर दोषी छन् भने नेता हुन् कि नाता होस्, एउटा पनि नछुटोस् । यो प्रकरणमा सरकारले दह्रोसँग खुट्टा टेक्यो भने सरकारले सुशासनको नारा लगाउन सक्छ । फिल्म चल्छ, हाउस फुल हुन्छ । नभए हल खाली हुन्छ,” उनले भने, “सुशासनमा आधारित रहेर भ्रष्टचारमा शून्य सहनशीलता, त्यसको आधारमा सुशासन प्रत्याभूत गर्ने कुरा गर्नुभएको छ । नक्कली भुटानी शरणार्थीको विषय यस्तो बोला आएको छ कि सरकाले यसलाई कसरी डिल गर्छ, यसैले बाँकी रहेको कुरा निर्धारण गर्छ । बजारको हल्लाले अनुसन्धान प्रभावित नहोस् । तर, कुनै भेटघाटले पनि प्रभावित नहोस्, कुनै दबावले प्रभावित नहोस् ।”

उनले अहिलेसम्म भएको र सरकारले लिएको कदमको प्रशंसा समेत गरे ।