विराटनगर । सवारी दुर्घटनामा परी प्रदेश नम्बर १ प्रदेश सभा सचिवालयका एजना कर्मचारीको निधन भएको छ । बुधबार विराटनगर महानगरपालिका–३ स्थित ढाटमा भएको मोटरसाइकल दुर्घटनामा सचिवालयका अधिकृत प्रेमबहादुर श्रेष्ठको निधन भएको हो ।
सुनसरीको धरान उपमहानगरपालिका–८ घर भएका श्रेष्ठ कार्यालयतर्फ आउने क्रममा दुर्घटनामा परेका थिए ।
जिल्ला प्रहरी कार्यालय मोरङका प्रवक्ता डीएसपी दीपक श्रेष्ठका अनुसार उत्तरबाट दक्षिणतर्फ आउँदै गरेको प्रदेश १–०४–००१ ब ०००७ नम्बरको मोटरसाइकल र उत्तरतर्फ जाँदै गरेको को ३८ प ५३८७ नम्बरको स्कुटर एकआपसमा ठक्कर खाँदा घटना भएको हो ।
गम्भीर घाइते भएका श्रेष्ठलाई उपचारका लागि मोरङको बूढीगंगास्थित विराट शिक्षण अस्पतालमा भर्ना गरिएको थियो । उपचारकै क्रममा अपराह्न उनको मृत्यु भएको प्रहरीले जनाएको छ ।
दुर्घटनामा स्कुटर चालक बूढीगंगा गाउँपालिका–२ का ३५ वर्षीय रोशन विक र पछाडि सवार विराटनगर–४ का २५ वर्षीय विशाल प्रसाईं सामान्य घाइते भएका छन् । उनीहरूको उपचार भइरहेको प्रहरीले जनाएको छ ।