काठमाडौं । ट्राफिक प्रहरीले ललितपुर महानगरपालिकालाई जाममुक्त सहर घोषणा गरेको छ । ‘ललितपुर महानगर– ट्राफिक जाम मुक्त सहर’ भन्ने मुख्य नारासहित ट्राफिक प्रहरीले आइतबारदेखि ललितपुरलाई जाम मुक्त सहर बनाउने काम थालेको हो । 

ललितपुर महानगरपालिका र अन्य सम्बन्धित निकायहरुसँग सहकार्य गर्दै ट्राफिक प्रहरीले आइतबार ललितपुरमा एक कार्यक्रम आयोजना गरी जाम मुक्त सहर घोषणा गरेको छ । ललितपुर महानगरपालिकाका मेयर चिरिबाबु महर्जन र महानगरीय ट्राफिक प्रहरी प्रमुख डीआईजी सर्वेन्द्र खनालले संयुक्त रुपमा ललितपुरलाई जाम मुक्त सहरको घोषणा गरेका थिए । 

कार्यक्रममा मेयर महर्जनले चुनाव जित्दा आफूले ललितपुरलाई जाम मुक्त सहर बनाउने घोषणा गरेकोले बोलेको कुरा पूरा गर्न लागिपरेको बताए । “बोलेको कुरा पूरा गर्नु मेरो कर्तव्य हो, यतिबेला सबैभन्दा बढी ट्राफिक समस्या छ । यसलाई मैलेमात्र गरेर केही हँुदैन । आवश्यकता नगरले पूरा गर्दै जानेछ, तर काम सबै मिलेर गर्नुपर्यो । यसको जिम्मा ट्राफिकलाई दिएका छौं, पूरा भएरै छाड्ने छ,” उनले भने । 

उपत्यका ट्राफिक प्रमुख डीआईजी सर्वेन्द्र खनाल र ललितपुर ट्राफिक प्रमुख प्रहरी निरीक्षक सिताराम हाछेथुको साथ पाएकाले जाम मुक्त अभियान सफल हुने विश्वास उनले व्यक्त गरे । कार्यक्रममा ट्राफिक प्रमुख खनालले राष्ट्रको प्रतिष्ठा ट्राफिक व्यवस्थापनसँग जोडिएको हुनाले त्यसमा लागिपर्ने बताए । “विकसित देश जस्तो हाम्रो व्यवस्था त छैन, तर हामीले चाहेमा केही गर्न सकिन्छ भन्ने लागेर हामीले ललितपुरलाई जाम मुक्त सहर बनाउने अठोट गरेका हौं, हामी गरेरै देखाउँछौं, त्यसको थालनी आजैबाट भएको छ,” उनले भने । 

तीन ठाउँमा ट्राफिक लाइट राखिने, दुइ ठाउँमा आकासे पुल
ट्राफिक व्यवस्थापनलाई सहज बनाउन ललितपुरको तीन ठाउँमा ट्राफिक लाइट र २ ठाउँमा आकासे पुल निर्माण हुने भएको छ । ललितपुरका मेयर महर्जनले ४ साताभित्र ट्राफिक लाइट जडान गर्ने र आकासे पुल निमार्णकाको काम सकिने बताए ।

उनका अनुसार ललितपुरको पुल्चोकस्थित कानदेउता चोक, मन्त्री क्वाटर जाने चोक र अल्का अस्पतालभन्दा अगाडिको चोकमा ट्राफिक लाइट जडान हुनेछन् । त्यसैगरी ललितपुरको पाटन अस्पताल अगाडि र लगनखेल चोकमा गरी २ ठाउँमा आकासेपुल निर्माण गरिने छ । दुवै काम ४ हप्तामा सकिने महर्जनको दाबी छ ।