काठमाडौं । निर्वाचन आयोगले स्याङजा क्षेत्र नम्बर २ मा बुथ कब्जा भएको भन्दै उजुरी परेपछि छानबिन गर्न टोली गठन गरेको छ । 

आयोगले तीन दिनभित्र छानबिन गरी रिर्पोट पेस गर्न आयोगका कानुन सहसचिव फणिन्द्र गौतमको नेतृत्वमा टोली पठाएको हो । 

“त्यहाँ एमाले र कांग्रेस दुवै पक्षबाट धाँधली भएको भनेर उजुरी आएको छ । हामीले तीन दिनभित्र रिर्पोट बुझाउन टोली पठाएको छौंँ,” आयोग स्रोतले भन्यो । 

स्याङजा २ मा मतदानमा धाँधली भएको भन्दै विवाद भएपछि मतगणना समेत सुरु हुन सकेको छैन । 

त्यस क्षेत्रमा पुनः मतदान हुनुपर्ने माग उठिरहेको छ । यो क्षेत्रमा कांग्रेसका उपसभापति धनराज गुरुङ र नेकपा (एमाले)की सचिव पद्मा अर्याल प्रतिस्पर्धामा छन् ।

आयोगले बाजुराको विवाद छानबिनका लागि पनि टोली खटाएको छ । त्यहाँ मतदानका क्रममा विवाद भएर गोलीसमेत चलेको थियो ।