काठमाडौं । आईएलटीएस नगरेरै अष्ट्रेलिया अध्ययनका लागि पठाइदिने भन्दै नेपाली युवालाई ठग्ने मलेसियन गिरोहका एक सदस्य पक्राउ परेका छन् । 

महानगरीय अपराध महाशाखाको प्रहरी टोलीले मलेसियन नागरिक रामदास बसकर दासलाई ठमेलबाट पक्राउ गरेको हो । रामदासले गएको ११ जना नेपालीबाट ८ लाखका दरले १ करोड २५ लाख रकम ठगी गरेको उजुरी परेपछि उनलाई पक्राउ गरी आवश्यक कारबाही अगाडि बढाइएको महानगरीय अपराध महाशाखाका प्रमुख एसएसपी दिवेश लोहनीले बताए । 

लोहनीले भने, “बिना आईएलटीएस अष्ट्रेलियामा रहेको आफ्नो कलेजमा अध्ययनको लागी लैजाने भन्दै ठगी गर्ने गिरोह सक्रिय रहेको देखियो । पटक–पटक नेपाल आएर सेमिनार गर्ने, विभिन्न आश्वासन दिने अनि रकम उठाएर जाने गरेको देखियो । पक्राउ परेका मलेसियनको कुरा सुन्दा उनीहरुले अन्य देशमा पनि ठगी गरेको हुन सक्छन् ।”

एसएलसी फेललाई पनि स्टुडेन्ट भिषा !
एसएलसीसमेत पास नगरेकालाई विद्यार्थी बनाएर अष्ट्रेलिया पुर्याउने भन्दै ११ जनालाई ठगी गर्ने रामदासले काठमाडौंमा सञ्चालित आईएफपी एजुकेसन कन्सल्टेन्सीलाई माध्यम बनाएका थिए । महानगरीय अपराध महाशाखाको वैदेशिक रोजगारी ठगी शाखाका इन्चार्ज डीएसपी मनोहर भट्टका अनुसार आईएफपी एजुकेसन कन्सल्टेन्सीका सञ्चालक चिन्टु लामा, अभिनाश गुरुङ र दिर्घ तामाङलाई प्रयोग गरी रामदासले ११ जनाबाट एक करोड २५ लाख रकम ठगी गरेका हुन् । 

उनका अनुसार रामदास गएको जनवरी २६ यता तीन पटक नेपाल आएका थिए । उनले नेपाल आएर विद्यार्थीका लागि सेमिनार आयोजना गरेका थिए । अष्ट्रेलियामा आफ्नो फ्युचर एकेडेमी कलेज रहेको र बिना आईएलटीएस अध्ययन नगरेकालाई पनि भिषा मिलाइदिन्छौं भन्दै रामदासले सेमिनारमा जम्मा भएकालाई लोभ देखाएका थिए । बिना आईएलटीएस ८ लाख रुपैयाँमै अष्ट्रेलिया जान पाइने भन्दै रामदासले विद्यार्थी जम्मा पार्ने कन्सलटेन्सीलाई समेत ठगी गरेको डीएसपी भट्टले बताए । 

रामदासले उठाएको रकम पीडितहरुले मलेसियन मूलका अष्ट्रेलियन नागरिक रे रिवेन्द्रको नाममा अष्ट्रेलियामा रहेको बैंक खातामा जम्मा गरेको प्रहरीले जनाएको छ । रकम असुलेपछि उनले पटक–पटक अष्ट्रेलियामा रहेको कलेजको विभिन्न नक्कली कागजपत्र बनाएर पठाउने गरेका थिए । लामो समयसम्म पनि भिषा नआएपछि कन्सलटेन्सीले महाशाखामा उजुरी गरेको थियो । महाशाखाले कन्सलटेन्सीकै सहयोगमा रामदासलाई नेपाल झिकाएको थियो । 

डीएसपी भट्टका अनुसार रामदासलाई नेपालमा धेरै जना जम्मा भएका छन् सेमिनार गर्नुपर्यो भनेर खबर गरेपछि उनी काठमाडौं आएका थिए । नेपाल आएका रामदासलाई ठमेलको गेष्टहासमा बसेका बेला पक्राउ गरिएको थियो । 

यसरी ठग्न सफल भए रामदास
११ नेपालीलाई ठगी गर्ने रामदास, कन्सलटेन्सी सञ्चालक गुरुङ र तामाङबीच मेलेसियामै चिनजान भएको थियो । रोजगारीको लागि मलेसिया गएर फर्किएका तामाङ र गुरुङले चिन्टु लामासँग मिलेर कन्सलटेन्सी खोले । मलेसियामै हुँदा अष्टे«लियामा मेरो कलेज छ, बिना आईएलटीएस नेपालीहरुलाई स्टुडेन्ट भिषा मिलाइदिन्छु भन्ने आश्वासन देखाएका कारण उनीहरुले रामदासलाई सम्पर्क गरी नेपाल झिकाएको प्रहरी अनुसन्धानबाट देखिएको छ  । 

पीडित ११ जनामा प्रायजसो कन्सलटेन्सी सञ्चालकका आफन्त नै भएको अनुसन्धानबाट खुलेको डीएसपी भट्टले बताए । सस्तोमा र कम पढेकाले पनि अष्ट्रेलिया जान पाउने र हप्तामा एक दिनमात्र पढाइ हुने बाँकी सबै दिन काम गर्न पाइने आश्वासन दिएका कारण कन्सलटेन्सीले आफ्नै रकम लगाएर आफन्तको नाम पठाएको थियो ।