काठमाडौं । आईतबार राति साढे १० बजे महानगरीय प्रहरी आयुक्त एआईजी जयबहादुर चन्दलाई एउटा नम्बरबाट एसएमएस आयो । 

एसएमएसमा केरुङबाट बा १७ च ६४२७ नम्बरको टाटा सफारी गाडीमा सुन छ ।  यो गाडी क्षेत्रपाटी क्षेत्रमा प्रवेश गरेको छ । त्यही समयमा उही एसएमएस महानगरीय अपराध महाशाखा प्रमुख एसएसपी दिवेश लोहनीलाई पनि आएको थियो । उक्त एसएमएसपछि एआईजी चन्दले महानगरीय प्रहरी वृत्त सोह्रखुट्टेको प्रहरी टोलीलाई खोज्न निर्देशन गरे ।

महाशाखाबाट एक टोली क्षेत्रपाटीतर्फ निस्कियो । राति करिब २ बजेतिर गाडीलाई प्रहरीले फेला पार्यो । प्रहरीले उक्त गाडीलाई आफ्नो घेरामा राख्योे । गाडीमा चालक मकवानपुरका मनोज अधिकारी थिए । चालकसहित बिहान ५ बजे महाशाखामा ल्याइयो । 

गाडीमा यति धेरै सुन होला भन्ने प्रहरीले अनुमानसमेत गरेको थिएन । “जब गाडी महाशाखाको प्राङ्गणमा ल्याइयो । त्यसपछि हामीले खोलेर हेर्न थालियो,” महानगरीय अपराध महाशाखाका प्रमुख लोहनीले बाह्रखरीसँगको कुराकानीमा भने, “गाडी एकदमै सामान्य अवस्थामा थियो । गाडी १७ लटको चलेकै नयाँ छ । गाडीको कुनै स्वरुप परिर्वतन भएको जस्तो पनि थिएन । तर यही गाडीमा सुन छ भन्ने भरपर्दो सूचना भएकाले हामीले जताततै खोलेर हेर्न थाल्यौं । गाडीको सिटभित्रदेखि बम्पर, लुकिङग्लास, गाडीको भित्रिभागमा हेर्यौं । लुकाएर राखिएको ८८ किलो फेला पर्यो । गाडीको टायरसमेत खोलेर हेरिएको छ ।”

महानगरीय प्रहरी आयुक्त एआईजी चन्दले पनि गाडीमा सुन छ भन्ने सूचना भरपर्दो नै भए पनि यतिधेरै होला भन्ने अनुमान नगरिएको बताए । उनले अनुमान गरिएको भन्दा निकै धेरै सुन बरामद भएको बताए ।

गाडीबाट सुन निकाल्न मात्रै ४ घण्टा लाग्यो 
 

आईतबार राति क्षेत्रपाटीबाट बरामद गरेको सुन गाडीको विभिन्न भागमा लुकाएर राखेको अवस्थामा थियो । महानगरीय महाशाखाको प्रहरी टोलीले मेकानिक्स बोलाएर सबै खोल्न लगाएको थियो । मेकानिक्सको सहयोगमा बिहान ५ बजेदेखि ९ बजेसम्म गाडीको प्रत्येक भाग चेकजाँच गरिएको थियो । सबै खोलिसकेपछि ८८ किलो फेला परेको थियो ।

सुनसँगै चिनियाँ नै आएको आशंका 
 

८८ किलो सुनसहित केही चिनियाँ नागरिक पनि काठमाडौं आएको प्रहरीले आशंका गरेको छ । “सुनसहित केही चिनियाँ नागरिक पनि आएको हुनुपर्छ तर गाडी ठमेल छिरेपछि चिनियाँहरु निस्केर गएको र गाडीमा भएको सुन मिलाएर निकाल्ने तयारी थियो होला,” लोहनी भन्छन्, “चालक र गाडी हामीले नियन्त्रणमा लिएको थाहा पाएर भागेका छन् । उनीहरुलाई पक्राउ गर्न हाम्रो टोली परिचालित भैसकेको छ । थप अनुसन्धान गर्दैछौं ।”

आज बजारमा सुनको मुल्य प्रतितोला ५७ हजार रहेको छ । ८८ किलो सुनको ४३ करोड, १ लाख ८८ हजार ६७९ रुपैयाँ पर्ने प्रहरीले जनाएको छ ।