काठमाडौं ।  असोज २ गते हुन लागेको प्रदेश नम्बर दुईका ८ जिल्लाको निर्वाचनमा यसअघि भएका दुई चरणका निर्वाचनभन्दा सुरक्षा व्यवस्था मजबुद बनाइएको गृह मन्त्रालयले जनाएको छ ।

सुरक्षाको दृष्टिले अन्य भन्दा २ नम्बर प्रदेश बढी संवेदनशील रहेको निष्कर्ष गृह मन्त्रालयको छ ।

२ नम्बर प्रदेशका ८ जिल्लामा भएका ३ हजार ५६७ मतदानकेन्द्रमा हुन लागेको निर्वाचनको लागी सम्पूर्ण सुरक्षा तयारी पूरा भईसकेको गृहमन्त्रालयका प्रवक्ता रामकृष्ण सुवेदीले जानकारी दिए । 

बाह्रखरीसँग कुरा गर्दै प्रवक्ता सुवेदीले भने, “अन्यको भन्दा २ नम्बरलाई सुरक्षाको दृष्टिमा संवेदनशील मानेका छौं । आवश्यकताअनुसार सुरक्षाको व्यवस्था गरेका छौं ।”
उनका अनुसार निर्वाचनको बुथको सुरक्षामा २६ हजार ६ सय ९८ जना प्रहरी परिचालन हुनेछन् भने त्यसबाहेक आवश्यकता हेरेर सशस्त्र प्रहरी र नेपाली सेना तथा सूचना संकलनका लागि राष्ट्रिय अनुसन्धान बिभागका कर्मचारी परिचालित हुनेछन् । 

सिके राउत समुह र भुमिगत समूह मुख्य चुनौती
 

तराईमा सक्रिय रहेका भूमिगत समूह र सिके राउत समुहको गतिविधि बढेको भन्दै चुनावमा उक्त समुहले चलखेल गर्न सक्ने सुरक्षा स्रोतले जानकारी दियो । 

चुनावलाई लक्षित गरी उक्त समुहले विभिन्न चलखेल गर्ने तयारी गरेको यसअघि नै गृहमा रिपोर्टिङ भईसकेको गृह स्रोतले जानकारी दियो । 

त्यसैगरी खुला सीमानाको फाईदा उठाउँदै चुनावमा आपराधिक चलखेल हुने सक्ने भन्दै त्यहीअनुसार सुचना संकलनका लागी सबै सुरक्षा निकायलाई सचेत रहन गृहले सर्कुलर गरेको छ । 

सीके राउत समूहले निर्वाचन विथाल्न सक्ने आशंकासहित तराईमा सुरक्षा व्यवस्था थप बढाइएको प्रहरी स्रोतले जानकारी दियो ।