![रुस र युक्रेनबीचको पहिलो चरणको वार्ता निष्कर्षविहीन, रुसी हमला जारी](https://12khari.top/uploads/posts/Russia and Ukraine1646064138.jpg)
मस्को । रुस र युक्रेनबीचको युद्ध चर्किएका बेला सोमबार यी दुई देशका बीचमा पहिलो चरणको शान्ति वार्ता भएको छ । सो वार्ता युक्रेन र बेलारुसबीचको सीमामा भएको थियो ।
रुसी र युक्रेनी अधिकारीहरूबीच पहिलो चरणको वार्ता सकिएको तर सो वार्ताले कुनै निष्कर्ष भने ननिकालेको अधिकारीहरूले जनाएका छन् । वार्तामा सहभागी अधिकारीहरू दुवै पक्ष आ–आफ्नो राजधानी फर्किएका छन् र उनीहरूले आवश्यक परामर्श गरी दोस्रो चरणको वार्ता गर्ने बताएका छन् ।
रुस पछिल्लो चरणमा वार्ता जारी राख्न सहमत भएको थियो । सोहीबमोजिम नै दुवै पक्ष वार्तामा बसेका थिए । रुस र युक्रेनले आगामी केही दिनभित्र नै अर्काे उच्चस्तरीय वार्तामा बस्ने जनाएका छन् ।
उता, रुसले भने पछिल्ला दिनमा युक्रेनको राजधानी किभका आवासीय क्षेत्रहरूमा हवाई आक्रमण गरेको छ । रुसले यहाँका आवासीय क्षेत्रहरूमै गोलाबारी गरिरहेको आरोप लगाइएको छ । यसरी नागरिकको आवासीय क्षेत्रलाई निसाना बनाइरहेको भन्ने कुराको भने रुसले अस्वीकार गरेको छ ।
राजधानी किभमा भने खतराको जनाउ दिने साइरनहरू बजेको बताइएको छ ।
त्यस्तै, युक्रेनको उत्तरी सहर चर्निभमा पनि गोलाबारी भइरहेको बताइएको छ । रुसले युक्रेनमाथि धेरै स्थानबाट हमला गरिरहेको छ । ती स्थानहरूमा युक्रेनी फौजको प्रतिवाद भने जारी छ । जसका कारण रुसी सेना अगाडि बढ्ने गति कम भएको छ । रासस/सिन्ह्वा