काठमाडौं । नेकपा (एमाले)का दोस्रो तहका नेताहरूबीच सोमबार मध्यरातिसम्म याक एण्ड यति होटलमा वार्ता भएको छ । विवाद समाधान गर्न गठित कार्यदलका सदस्यसमेत रहेका एमालेका दोस्रो तहका नेताहरू पार्टी मिलाउन अन्तिम कसरतमा जुटेका हुन् ।

वार्तामा प्रधानमन्त्री केपी शर्मा ओलीकातर्फबाट कार्यदलमा संयोजन गरिरहेका सुवास नेम्वाङ, अर्थमन्त्री विष्णु पौडेल, परराष्ट्मन्त्री प्रदीपकुमार ज्ञवाली रहेको बताइएको छ । असन्तुष्ट समूहको नेतृत्व गरिरहेका झलनाथ खनाल र माधवकुमार नेपाल समूहबाट घनश्याम भुसाल, सुरेन्द्र पाण्डे, गोकर्ण विष्ट र योगेश भट्टराई रहेको बताइएको छ । भीम रावल भने छलफलमा बाहिरै रहे ।

रावल पार्टी विवाद मिलाउने भन्दा पनि बल्झाउनेतिर केन्द्रित रहेको भन्दै गोप्य छलफलमा सहभागी नगराइएको ओलीनिकट एक नेताले जानकारी दिए । यसअघि जेठ ९ गते बसेको बैठकमा पनि रावललाई बोलाइएको थिएन ।

“हामी अन्तिम कसरतमा छौँ । विषय मिलिसकेका छैनन् । उहाँहरूको जेठ २ कै रटानमा हुनुहुन्छ । सबै पार्टी कमिटीहरू जेठ २ मै फर्काएर छलफल आरम्भ गर्नुपर्छ भन्नेमै हुनुहुन्छ । हामी मिलन विन्दु के हुन्छ खोजिरहेका छौँ,” छलफलमा सहभागी एक नेताले भने ।

जुम मिटिङमा तीन दिनभित्र विवाद मिलाउन विष्टलाई चुनौती

स्रोतका अनुसार खनाल–नेपाल समूहमा नयाँ पार्टी गठनका लागि दबाब बढ्दो छ । गत आइतबार नेता नेपालले आफूनिकट विद्यार्थीहरू (अनेरास्ववियु)को भेलामा नयाँ क्रान्तिकारी पार्टी गठन गरेर जानुको विकल्प नरहेको बताएका थिए । जुम भेलामा पहिले बोलेका गोकर्ण विष्टले एकता नै अन्तिम सत्यजसरी प्रस्तुत भएको अनेरास्ववियुका एक नेताले बताए । 

“पार्टी एकताको विकल्प छैन । पार्टी एकताले नै आन्दोलनलाई बलियो बनाउँछ,” विष्टको भनाइ उद्धृत गर्दै एक नेताले भने, “अहिले नयाँ आन्दोलन विकास गर्ने अवस्था पनि छैन । जेठ २ मै पार्टी आन्दोलन फर्काउनेगरी समझदारी गरेर जानुपर्छ ।”

विष्टको यस्तो भनाइ सुनेपछि नेता नेपालले ओलीसँग मिल्नै नसकिने आधार प्रस्तुत गरेका थिए । प्रधानमन्त्री ओली अहिले जेठ २ मा फर्कन सैद्धान्तिक र व्यवहारिकरूपमै तयार देखिए पनि कार्यान्वयन नगर्ने नेता नेपालले बताएका थिए । कुनै समझदारी पालना नगर्ने ओलीको विगतदेखिको बानी नै एकताको बाधक बन्ने नेता नेपालको निचोड थियो ।

“अहिले पनि उनको अल्मल्याउने रणनीति हो । यसमा हामी प्रष्ट हुनुपर्छ । अहिले अल्मल्याउन सकियो भने चुनाव घोषणा भइसकेको छ । नयाँ पार्टी गठन गर्न मिल्दैन । भोलि टिकट वितरणमा एकलौटी गरेर हामीलाई टेक्ने ठाउँ दिँदैनन् । त्यसकारण अहिले नै छिनोफानो गरेर नयाँ क्रान्तिकारी, रूपान्तरणसहितको आन्दोलन निर्माण गर्नुपर्छ,” माधव नेपालको भनाइ उद्धृत गर्दै ती विद्यार्थी नेता भने ।

अन्तिममा नेता नेपालले मिल्ने नै हो भने जेठ २ लाई नै आधार बनाएर तीन दिनभित्र काम फत्ते गर्न विष्टलाई चुनौती दिएका थिए ।

सोमबार याक एन्ड यतीमा के भयो ?

वार्तामा रहेका ओली पक्षका एक नेताका अनुसार घनश्याम भुसाल, सुरेन्द्र पाण्डे, योगेश भट्टराई र गोकर्ण विष्ट तीनै जना पार्टी मिलाउन सकारात्मक छन् । उनीहरूको कुराप्रति ओली ‘कन्भिन्स’ नै छन् । सोमबार पनि जेठ २ मा फर्काउन सैद्धान्तिक आधार तयार गर्ने विषयमै छलफल केन्द्रित रहेको ओलीनिकट नेता बताउँछन् ।

“अब एक–दुईदिनभित्रै परिणाम आउँछ । हामी त्यो हिसाबले लागेका छौँ । तर, उतापट्टि जसरी हुन्छ एकता भाँड्ने चिन्तन हावी हुँदै गएको छ । संवादमा रहेकाहरूलाई उतै लागे भन्ने आरोप पनि छ । चुनौतीपूर्ण छ तर पार लगाउँछौँ,” उनले भने ।

स्रोतका अनुसार पार्टी कमिटीलाई जेठ २ मा फर्काउन ओली तयार छन् । थपिएका ४१ ( २०७५ जेठ ३) र  २३ (२०७७ फागुन २८) केन्द्रीय सदस्य स्वीकार गर्न कार्यदलका सदस्य तयार छन् । मातहतका कमिटीका सम्बन्धमा के गर्ने निर्क्यौल भइनसकेको ती सदस्य बताउँछन् ।

कारबाही थाती रहने

एमालेले आज (मंगलबार) स्थायी कमिटीको सातौँ बैठक बोलाएको छ । दुई पटक (आइतबार र सोमबार) स्थगित गरेर आज बिहान ११ बजे बस्ने तय गरिएको बैठकले लुम्बिनी प्रदेशको राष्ट्रियसभा उपचुनावको समीक्षा गर्ने छ । बजेटबारे पनि छलफल गर्ने छ । स्पष्टीकरण सोधिएका र जवाफ नदिएका १२ सांसदहरूको बारेमा भने कुनै निर्णय नलिने एक स्थायी कमिटी सदस्यले बताए ।

“हामी हिजो पनि वार्तामा बस्यौँ । घनिभूत छलफल भयो । पार्टी जसरी पनि मिलाउनुपर्छ भन्ने हाम्रो साझा दृष्टिकोण, निष्कर्ष, निचोड पनि छ । यस्तो अवस्थामा कारबाहीको प्रसंग नै उठ्दैन । फेरि स्पष्टीकरण सोधिएका कमरेड कार्यदल (घनश्याम भुसाल, सुरेन्द्र पाण्डे)मा नै हुनुहुन्छ,” ती नेता भन्छन् ।

उनले पार्टी विवाद मिल्ने हकमा यसभन्दा अघिका विषयलाई ‘कट् अफ् डेट’ मानेर अघि बढ्न सकिने पनि बताए ।