काठमाडौं । अर्थ मन्त्रालयले आर्थिक वर्ष ०७८/७९ बजेट लेख्ने टोली तयार पारेको छ । मन्त्रालयको आर्थिक नीति विश्लेषण महाशाखा प्रमुख रामप्रसाद घिमिरेको संयोजकत्वमा पाँच सदस्यीय बजेट मस्यौदा लेखन टोली गठन गरिएको हो ।

मन्त्रालयको फागुन १९ को मन्त्रीस्तरीय निर्णयअनुसार टोलीले विनियोजन विधेयकको सिद्धान्त र प्राथमिकताको मस्यौदा तयार गर्नेछ ।

घिमिरे नेतृत्वको बजेट मस्यौदा लेखन टोलीमा राजस्व व्यवस्थापन महाशाखा प्रमुख रामेश्वर दंगाल, अन्तर्राष्ट्रिय आर्थिक सहायता समन्वयन महाशाखा प्रमुख श्रीकृष्ण नेपाल, बजेट तथा कार्यक्रम महाशाखा प्रमुख धनीराम शर्मा र मन्त्रालयका प्रवक्तासमेत रहेका योजना, अनुगमन तथा मूल्यांकन महाशाखा प्रमुख सुमन दाहाल छन् ।

राष्ट्रिय योजना आयोगले अर्थ मन्त्रालयलाई बजेटको सिलिङ पठाइसकेको छ भने सम्बन्धित मन्त्रालयलाई पनि मन्त्रालयगत सिलिङ पठाइसकेको छ । अब ती मन्त्रालयले आफ्ना निकायलाई मन्त्रालयगत बजेट सूचना प्रणाली (एलएमबीआईएस) मा समावेश गरेर बजेट प्रस्ताव गर्न आग्रह गर्नेछ । सरकारी नीति, राष्ट्रिय नीति तथा दीर्घकालीन योजनालाई आधार मानेर तीसँग समानान्तर हुने गरी बजेट प्रस्ताव गरिन्छ ।

अर्थ मन्त्रालयका प्रवक्ता सुमन दाहालले सो प्रस्ताव सिलिङभित्र रहोस् भन्नका लागि अर्थले अन्य मन्त्रालयसँग छलफल गर्ने बताए । छलफलका लागि टोली गठन भइसकेको जानकारी उनले दिए ।

“मन्त्रालयबाट गठित बजेट मस्यौदा लेखन टोलीले छलफललाई अघि बढाउँछ,” दाहालले भने, “टोलीले नीति तथा कार्यक्रमको तयारी पनि गर्नुपर्नेछ । त्यसको तयारी सुरु भइसकेको छ । एक किसिमले भन्नुपर्दा बजेट तयारी सुरु भएको छ ।”

राष्ट्रिय योजना आयोगले आगामी आर्थिक वर्षको बजेट सिलिङ दिइसकेको छ । आयोगको मध्यकालीन खर्च संरचनाअनुसार अपेक्षित उपलब्धि हासिल गर्न सरकारले आगामी आर्थिक वर्ष १६ खर्ब ९७ अर्ब रुपैयाँको बजेट तयार पार्नुपर्नेछ ।