काठमाडौं । संवैधानिक आयोगमा गरिएका नियुक्ति बदरको माग गर्दै दायर रिट ११औँपटक पनि स्थगितमा परेको छ । सर्वोच्च अदालतको संवैधानिक इजलासमा आज पेसी तोकिए पनि इजलास बसेन ।
रिट निवेदक अधिवक्ता ओमप्रकाश अर्यालले सो रिट ११औँपटक पनि स्थगितमा परेको जानकारी दिए । रिटमा मुद्दालाई अग्राधिकारमा राखी सुनुवाई गरी पाऊँ भन्ने माग गरिए पनि पटक–पटक पेसी चढ्ने तर सुनुवाइ भने नहुने हुँदै आएको छ ।
संवैधानिक परिषद्मा निर्णय गर्न बहुमत नपुगेपछि अध्यादेश ल्याई गएको मंसिर ३० मा विभिन्न संवैधानिक आयोगहरुमा रिक्त अध्यक्ष र सदस्यहरुको नाम सिफारिस गरिएको थियो । उनीहरुले शपथ लिएर कार्यभारसमेत सम्हालिसकेका छन् ।
रिटमा संवैधानिक परिषद्सम्बन्धी अध्यादेश ल्याएर गरिएका सिफारिस जालसाजीयुक्त भएको भन्दै सो अध्यादेशका आधारमा भएका नियुक्ति बदरको माग गरिएको छ । रिटमा मन्त्रिपरिषद्को सिफारिसमा राष्ट्रपतिबाट जारी भएको संवैधानिक परिषद् (काम, कर्तव्य, अधिकार र कार्यविधि)सम्बन्धी (पहिलो संशोधन) अध्यादेश, २०७७ समग्र रूपमा र त्यसको प्रस्तावना, दफा १, दफा २ र दफा ३ का सम्पूर्ण प्रावधानहरु अमान्य र बदर घोषित गर्न माग गरिएको छ । अध्यादेश राजपत्रमा प्रकाशित नहुँदै बोलाइएको संवैधानिक परिषद्को बैठक, त्यसले गरेका काम–कारबाही समग्र रूपमा उत्प्रेषणको आदेशले बदर गर्न माग गरिएको छ ।
त्यस्तै, मुद्दाको अन्तिम किनारा नलागेसम्म उक्त विवादित अध्यादेशको कार्यान्वयन नगर्न/नगराउन, उक्त अध्यादेशका आधारमा आयोजना हुने संवैधानिक परिषद्को बैठकमा भाग नलिन, नियुक्तिको सिफारिस तथा नियुक्तिसम्बन्धी अन्य कुनै पनि कार्य नगर्नू/नगराउनू भनी आदेशको दिन माग गरिएको छ ।
रिटमा प्रधानमन्त्री तथा मन्त्रिपरिषद्को कार्यालय, राष्ट्रपति कार्यालय, संवैधानिक परिषद्को अध्यक्ष र सचिवालय, परिषद्का सदस्य रहेका प्रधानन्यायाधीश, प्रतिनिधिसभाका सभामुख, राष्ट्रियसभाका अध्यक्ष र विपक्षी दलका नेतालाई विपक्षी बनाइएको छ ।
को–कहाँ नियुक्त ?
अख्तियार दुरुपयोग अनुसन्धान आयोगको अध्यक्षमा प्रेमकुमार राई र सदस्यहरुमा जयबहादुर चन्द र किशोरकुमार सिलवाल, निर्वाचन आयोगमा रामप्रसाद भण्डारी र डा. जानकी तुलाधर, मानवअधिकार आयोगको अध्यक्षमा टोपबहादुर मगर र सदस्यहरुमा मनोज दुवाडी, डा. सूर्य ढुंगेल, लिलि बस्नेत थापा र मिहि ठाकुर, राष्ट्रिय प्रकृति स्रोत तथा वित्त आयोगमा जुद्ध गुरुङ र अमरराज मिश्र, महिला आयोगको अध्यक्षमा कमलाकुमारी पराजुली र सदस्यहरुमा कृष्णकुमारी पौडेल खतिवडा र विद्याकुमारी सिन्हाको नाम सिफारिस भएको थियो । त्यस्तै, दलित आयोगको अध्यक्षमा देवराज विक र सदहरुस्यमा मीना सोभ, परशुराम रम्तेल, कुञ्ज बराइली र मेहेले पार्की, राष्ट्रिय समावेशी आयोगको अध्यक्षमा मनप्रसाद खत्री र सदस्यहरुमा रामचन्द्र जोशी, हरिभक्त जोशी र जितेन्द्र पाश्वान, आदिवासी आयोगको अध्यक्षमा रामबहादुर थापा र सदस्यहरुमा मीन श्रीसमगर, मीनसिंह लामा, रीना राना र चरण राई, मधेसी आयोगमा जीवक्ष साह, रेणुदेवी शाह र विजय गुप्ता सिफारिस भई नियुक्त भएका छन् ।
