फाइल तस्बिर । 

काठमाडौं । वीर अस्पतालका स्वास्थ्यकर्मीहरुले कोरोना जोखिम चैतदेखि नै नपाएको गुनासो गरेका छन् । अस्पतालले स्वास्थ्यकर्मीहरुलाई आवश्यक स्वास्थ्य सामग्री अभाव भएको,  जोखिम भत्ता नपाएको, क्वारेन्टिनको राम्रो व्यवस्थापन नभएको कर्मचारीहरुले गुनासो गरेका हुन् । 

अस्पतालका निर्देशक डा. केदार सेन्चुरीले स्वास्थ्य सामग्रीको राम्रो व्यवस्थापन गर्न नसकेको स्वीकारेका छन् । मास्क, ग्लोब र पीपीईलगायतका स्वास्थ्य सुरक्षाका सामग्री व्यवस्थापनमा चुनौती रहेको उनले बताएका छन् । सप्लार्यसले पनि स्वास्थ्य सामग्री समयमा नदिने र स्वास्थ्य सेवा विभागले थोरै दिने गरेको उनको गुनासो छ ।
 
क्वारेन्टिनको राम्रो व्यवस्था नहुनुको साथै आइसोलेसनमा राम्रो सेवा नपाएको र क्वारेन्टिनमा प्लास्टिकमा खाना दिने गरेको स्वास्थ्यकर्मीहरुको आरोप छ । तर अस्पतालका निर्देशक डा.सेन्चुरीका अनुसार एक दिन क्वारेन्टिनमा रहेका स्वास्थ्यकर्मीहरुलाई प्लास्टिकमा खाना दिएको गुनासो आएको भए पनि उक्त समस्या अहिले समाधान भएको छ । 

उनकाअनुसार अस्पतालले आलोपालो व्यवस्था गरेको छ  । एक साता एउटा टिम र अर्को साता अर्को टिमले काम गर्छ । कोरोना संक्रमितको सम्पर्कमा आएका तर कुनै पनि लक्षण नभएका कोरोनाको परीक्षणको रिपोर्ट नआएसम्म स्वास्थ्यकर्मीहरुलाई सुन्धाराको एक होटलमा राख्‍ने व्यवस्था गरेको उनी बताउँछन् ।

यसैगरी स्वास्थ्य तथा जनसंख्या मन्त्रालयले स्वास्थ्यकर्मीले पाउने जोखिम भत्ता र स्वास्थ्य सामग्रीका लागि कम रकम  निकासा गर्दा स्वास्थ्कर्मीलाई जोखिम भत्ता दिन समस्या भएको उनी बताउँछन् । 

“अन्य अस्पतालका स्वास्थ्यकर्मीहरुले जोखिम भत्ता पाइसके हामीहरुले कहिले पाउने भनेर स्वास्थ्यकर्मीहरु प्रश्न गर्छन्, आफूले मन्त्रालयमा जोखिम भत्ता माग गरेको तर मन्त्रालयले अहिलेसम्म पनि निकासा गरेको छैन्,” उनले भने । 

अस्पतालका आकस्मिक कक्षका एक चिकित्सकका अनुसार ग्लोभ्सको अभाव हुँदा सेवा दिन समस्या भएको छ । ती चिकित्सकले भने, “कोभिड र नन कोभिड बिरामी दुवैको उपचार गर्नुपर्ने चुनौती रहेको छ ।”

न्याम्सका कर्मचारीलाई तलब भत्तासमेत दिन नसकेको उनले गुनासो गरे । अस्पतालले हाल ३० जना स्वास्थ्यकर्मीहरुलाई  सुन्धारास्थित एक होटल क्वारेन्टिनमा राखिए भए पनि उक्त क्वारेन्टिन व्यवस्थित र राम्रो नभएको अस्पतालको कर्मचारी युनियनको गुनासो छ । 

लक्षण भएका संक्रमितलाई मात्र भर्ना 

अस्पतालका निर्देशक डा.सेन्चुरीका अनुसार अस्पतालका स्वास्थ्यकर्मी चिकित्सकलगायत हालसम्म २२ जनामा कोरोना संक्रमण देखिएको जानकारी दिए । 

उनका अनुसार अस्पतालले जाइका भवनको पहिलो र दोस्रो फ्ल्याटमा कोरोना संक्रमितका लागि आइसोलेनको  व्यवस्था गरेको छ । हाल अस्पतालको आइसोलेसनमा २४ जना कोरोना संक्रमित उपचाररत रहेको उनले जानकारी दिए । उनका अनुसार आइसोलेमा कोरोना लक्षण भएका  संक्रमित मात्र राख्ने गरेका छौँ । 

उनले भने, “अस्पतालका स्वास्थ्यकर्मी तथा चिकित्सकहरु लक्षण देखिएकाहरु अस्पतालमै भर्ना भएर उपचाररत  छन् भने लक्षणविहीन स्वास्थ्यकर्मी घरमै होम आइसोलेनमा छन् ।”