काठमाडौं । नेपाली कांग्रेसका कर्णाली प्रदशेअन्तर्गतका जिल्ला सभापतिहरूले १४औं महाधिवेशनको निर्धारित कार्यतालिकाअनुसार अधिवेशन सम्पन्न गर्न समस्या हुने निष्कर्ष निकालेका छन् । 

केन्द्रले निर्धारण गरेको समयमा हिमाली जिल्लाहरूमा हिउँपर्ने भएकाले पार्टीको १४औं महाधिवेशनको कार्यतालिकाअनुसार कर्णाली प्रदेशमा वडादेखि जिल्ला अधिवेशन सम्पन्न गर्न समस्या हुने निष्कर्ष निकालेका हुन् । 

कर्णाली प्रदेशका जिल्ला सभापतिहरूको ‘भर्चुअल’ अन्तर्क्रियामा केन्द्र निर्धारण गरेको समयावधिमा अधिवेशनहरू सम्पन्न गर्न समस्या हुने निष्कर्ष निकालिएको कांग्रेस मुगुका सभापति खड्गबहादुर शाहीले जानकारी दिए । 

“कार्यतालिका अनुसार हिमाली जिल्लाहरूमा अधिवेशनहरू सम्पन्न गर्न सकिँदैन कि भन्ने कुरा उठिरहेको छ,” उनले बाह्रखरीसँग भने, “कर्णाली प्रदेशका अधिकांश सभापतिको पनि तोकिएको समयमा अधिवेशन गर्न समस्या हुने निष्कर्ष छ ।”

जिल्ला सभापति शाहीले हिमाली जिल्लामा हिमपात हुने समयमा वडादेखि जिल्ला अधिवेशन सम्पन्न गर्नुपर्ने कार्यतालिका निर्धारण गर्दा निर्धारित समयमै अधिवेशन हुने सम्भावना न्यून देखिएको बताए । 

कांग्रेसमा १४औं महाधिवेशनको चहलपहल

महाधिवेशनको परिमार्जित कार्यतालिका अनुसारआगामी पुस ६ गते देशभरका गाउँ–नगरअन्तर्गत पर्ने ६ हजार ७४३ वडामा कांग्रेसको अधिवेशन हुनेछ । यस्तै सात सय ५३ स्थानीय तहमा पुस ८ गते, प्रदेशसभा क्षेत्रीय अधिवेशन पुस ११ गते र प्रतिनिधिसभाको एक निर्वाचन क्षेत्र भएका जिल्लाको अधिवेशन पुस १३ गते हुने भएको छ । 

एकभन्दा बढी प्रतिनिधिसभा निर्वाचन क्षेत्र भएका जिल्लामा पुस १६ गते र प्रदेश अधिवेशन आगामी माघ ६ गते हुने भएको छ । पार्टीको महाधिवेशन भने पूर्वनिर्धारित मिति फागुन ७ बाट १० गतेसम्म काठमाडौंमा छ । गत माघ १३ गते बसेको केन्द्रीय कार्यसमिति बैठकले पार्टीको आगामी महाधिवेशन २०७७ फागुन ७–१० काठमाडौंमा गर्ने सर्वसम्मत निर्णय गरेको थियो ।

यसअघि ‘भर्चुअल’ अन्तर्क्रियामा सहभागी प्रदेश १, २, वाग्मती, गण्डकी र ५ का जिल्ला सभापतिहरूले पनि तराई र पहाडका जिल्लाहरूमा तोकिएको समयावधिभित्र अधिवेशन गर्न समस्या नभए पनि हिमाली जिल्लाको कार्यतालिका परिवर्तनका लागि केन्द्रलाई आग्रह गर्नुपर्ने धारणा राखिसकेका छन् ।

केन्द्रले ‘अफ टाइम’ तोक्यो, जिल्ला सभापतिहरु छलफलमै

७७ वटै जिल्लाका सभापतिहरूले ‘भर्चुअल मिटिङ’ पछि निस्कने निष्कर्षका आधारमा हिमाली जिल्लाको अधिवेशन मिति सार्नेबारेमा केन्द्रीय कार्यसमितिसमक्ष आग्रह गर्नुपर्ने जिल्ला सभापति शाहीले बताए । 
“आज (मंगलबार) बेलुकी सुदूरपश्चिमका जिल्ला सभापतिहरूसँग ‘जुम मिटिङ’ छ । उहाँहरूसँगको सरसल्लाहपछि अधिवेशनको कार्यतालिका केही अघि वा केही पछि सार्नुपर्नेबारे केन्द्रलाई आग्रह गर्छौं,” उनले भने । 
पार्टीको अधिवेशन, जिल्ला सभापतिहरूले उठाउँदै आएका माग, समसामयिक राजीतिक अवस्थालगायत विषयमा छलफल गरिने ‘भर्चुअल’ अन्तर्क्रियाको समन्वय काभ्रेका सभापति मधु आचार्य र रोल्पाका सभापति अमरसिंह पुनले गर्दै आएका छन् । 

कांग्रेस शीर्ष नेताकै जिल्लामा समायोजन बाँकी, होला त फागुनमा महाधिवेशन ?