काठमाडौं ।  – शनिबार बिहान नेकपा (माओवादी केन्द्र) का तर्फबाट भरतपुर महानगरपालिका प्रमुखका उमेदवार रहेकी रेणु दाहालको चुनावी प्रचारमा प्रयोग गरिएको गाडीमा तोडफोड भयो । आफन्तको घरमा रोकेर राखेका बेला बा ११ च ९०३० नम्बरको गाडीलाई अज्ञात समूहले तोडफोड गरेको र उक्त घटनाका बारेमा अनुसन्धान भइरहेको प्रहरीले जनाएको छ । 

– त्यस्तै, शनिबार राति खैरहनी नगरपालिकाका नेपाली कांग्रेसका तर्फबाट मेयर पदका उमेदवार राजेन्द्रप्रसाद चौधरीको गाडीमा तोडफोड भयो । चुनाव प्रचार गरेर साँझ घर फर्केर आँगनमा रोकिराखेको बा ८ च १५६२ नम्बरको गाडीमा तोडफोड भएको हो । गाडी तोडफोड गर्नेहरुको पहिचान हुन सकेको छैन । घटनाका बारेमा अनुसन्धान भइरहेको प्रहरीले जनाएको छ । 

– गएको शुक्रबार राति नेपाली कांग्रेसका तर्फबाट नुवाकोटको शिवपुरी गाँउपालिका अध्यक्षका उमेदवार रामकृष्ण थापाको गाडीमा तोडफोड भयो । बा ११ च ३४९९ नम्बरको स्कर्पियो गाडीमा अज्ञात समूहले तोडफोड गरेको र तोडफोड गर्नेको पहिचान नभएको प्रहरीले जानकारी दिएको छ । 

– त्यस्तै, शुक्रबार नै साँझ धादिङको थाँक्रे गाउँपालिकामा चुनाव प्रचारका लागि प्रयोग गरिएको एउटा गाडीमा आगजनी भयो । एमालेका तर्फबाट थाँक्रे–२ का वडाध्यक्षका उमेदवार राजकुमार पौडेलको बा ९ च ८९२९ नम्बरको हाइलक्स जिप प्रचारपछि घरमा राखेका बेला आगजानी गरिएको प्रहरीले जनाएको छ । आफ्नो चुनावी प्रचार सकेर घरको परिसरभित्र राखेको अवस्थामा गाडी जलाइएको पौडलले जनाएका छन् । 

स्थानीय तहको निर्वाचनका लागि विभिन्न पदमा उमेदवारी दर्ता गरेर प्रचारमा होमिएका उमेदवारहरुको सवारीसाधनमा तोडफोड हुने क्रम बढेको छ । दिउँसो चुनाव प्रचार गरेर घर फर्केका उमेदवारले आफ्नो घरमा पार्किङ गरेर राखेका सवारीसाधन बिहान तोडफोड भएको अवस्थामा फेला पर्ने गरेका छन् । 
यसरी तोडफोड गर्नेमा विप्लव माओवादीको हात रहेको अनुमान गृह मन्त्रालयले गरेको छ । गृह मन्त्रालयका प्रवक्ता बालकृष्ण पन्थी भन्छन्, “जोगीका भेषमा आएर क्षति पुर्याउनेलाई के भन्ने ? पछिल्ला दिनमा उमेदवारका सवारी साधनमा तोडफोडको घटना हुन थालेका छन् । एकैनासका घटना भएका छन्, कसले गराएको भन्ने कुरा खुल्दैछ । दिउँसो चुनाव प्रचार गरेर घर फर्केका मानिसका गाडी पार्किङ गरेको बेला राति चोरको जस्तो आएर तोडफोड गरेको देखियो । तिनको पहिचान हुन्छ र कारबाही पनि हुन्छ ।”

यस्तो कामलाई उनले आपराधिक क्रियाकलाप भनेका छन् । 

निर्वाचन विरोधी गतिविधि गर्ने ११६ पक्राउ
प्रवक्ता पन्थीका अनुसार निर्वाचन विरोधी गतिविधि गर्ने नेत्रविक्रम चन्द्र (विप्लव) नेतृत्वको माओवादीका १ सय १६ जना कार्यक्रताहरु पक्राउ परेका छन् । 
विभिन्न १६ जिल्लाबाट पक्राउ परेका उनीहरुममध्ये केहीलाई सोधपुछपछि छाडिएको र केहीको अनुसन्धान जारी रहेको प्रवक्ता पन्थीले बताए । 
उनले थपे, “यसरी उमेदवारको गाडीमा तोडफोड गर्ने तथा क्षति पुर्याउने काम विप्लव माओवादी कार्यकर्ताको हो, दोषीलाई कारबाही हुन्छ । हामीले विप्लव माओवादीका नेता कार्यकर्ता र उनीहरुको गतिविधिमा थप निगरानी बढाएका छौं ।”