याङ्गुन । म्यानमारको सैनिक सरकार (जुन्टा)ले चारजना प्रजातन्त्र समर्थक अभियन्तालाई मृत्युदण्ड दिएको छ ।
म्यानमारमा दशकौँपछि पहिलो पटक ठूलो सजाय दिइएको विश्वास गरिएको छ । अभियन्ता को जिम्मी र विधायक फिओ जेया लगायत चारै जनालाई आतंककारी गतिविधिमा संलग्न रहेको अभियोग लगाइएको छ ।
उनीहरूलाई गोप्य ढंगले मुद्दा चलाएर मृत्युदण्ड सुनाइएको हो । मानव अधिकारवादी समूहहरूले यस्तो मुद्दा अन्यायपूर्ण भएको भन्दै आलोचना गरेका छन् । सोमबार मृतकका परिवारका सदस्यहरू दुःखद खबर पाएपछि विचलित अवस्थामा इन्सेइन कारागारमा जम्मा भएका थिए ।
जायार थका आमाले आफ्नो छोरालाई कहिले मृत्युदण्ड दिइन्छ भन्ने यकिन समय आफूलाई नभनिएको र त्यसको कारण राम्ररी परम्परागत अन्त्येष्टि योजना तयार गर्न नसकेको गुनासो गरेकी छन् ।
जाराकी आमा खिन विन मेले बीबीसीको बर्मेली सेवालाई भनिन्, “हाम्रो शुक्रबार जूममा कुरा भएको थियो । मेरो छोरा स्वस्थ्य र हसिलो देखिन्थे । उनले पढ्ने चश्मा, शब्दकोष र केही पैसा कारागारमा पठाइदिन अनुरोध गरेका थिए । त्यसैले आज मैले ती सबै चिज लिएर यहाँ आएकी छु । छोराले यी चिज मगाएकै कारणले पनि मलाई उनीहरूले उनलाई मृत्युदण्ड देलान् जस्तो लागेको थिएन । अझै पनि विश्वास लागेको छैन ।”
यसैगरी जिम्मीकी बहिनी क्य मिन युले आफूहरूलाई अझै सम्म शव जिम्मा लगाइ नसकेको बताएकी छन् ।
सरकारी समाचार सञ्जाल ग्लोवल न्युज लाइट अफ म्यानमारले निर्मम र अमानवीय आंकककारी कार्यका लागि निर्देशन, व्यवस्थापन र षड्यन्त्र गरेको कारण उनीहरूलाई मृत्युदण्ड दिइएको जनाएको छ ।
बीबीसीबाट ।
