काठमाडौं । प्रहरीले रोल्पाको थवाङ गाँउपालिका ३ घर्तिगाँउबाट ५० किलो अवैध लागुऔषध चरेशसहित २ जनालाई पक्राउ गरेको छ । 

प्रदेश नम्बर ५ प्रहरी कार्यालयको विषेश ब्युरोको टोलीले शनिबार बिहानपख अर्थात् करिब ४ बजेतिर ५० किलो तयारी अवस्थामा रहेको अवैध लागुऔषध चरेश बरामद गरेको हो । 

विषेश सूचनाको आधारमा रोल्पा पुगेको ब्युरोको टोलीले लातावाङका २२ वर्षिय प्रश्न बुढामगर र शेरबहादुर बुढामगरलाई नियन्त्रणमा लिएर उनीहरुको साथबाट ५० किलो अवैध चरेश बरामद गरेको प्रदेश नम्बर ५ प्रहरी प्रमुख एआईजी मधु पुडासैनीले बताए । 

“५ नम्बर प्रदेश प्रहरी कार्यालयले लागुऔषधुविरुद्ध अभियाननै संचालन गरेको छ,” एआईजी पुडासैनीले बाह्रखरीसँग कुरा गर्दै भने, “अवैध लागुऔषधको कारोबार तथा ओसारपसार हुने क्षेत्रलाई पहिचान गरी विषेश निगरानी बढाएका छौं । रोल्पा चरेश उत्पादन हुने मुख्यस्थल भएकाले रोल्पामा अलि बढी निगरानी गरेका छौं ।”

प्रहरीका अनुसार आईतबार राति पक्राउ परेका २ जना गाँउमा चरेश उत्पादन गर्न लगाउने र संकलित चरेश भारतीय बजारमा पुर्याउने काम गर्दै आएका थिए ।

नेपालगञ्जमा जति पाईने मुल्य गाँउमा पाउने भएपछि उनीहरुले पक्राउ गर्न गएको प्रहरी टोलीलाई ४० हजार प्रति किलोका दरमा चरेश दिन राजी भएका थिए  । 

त्यसपछि मात्रै प्रहरीले आफ्नो परिचय दिँदै पक्राउ गरेका थिए । प्रहरीका अनुसार विशेष  सूचना प्राप्त भएपछि ग्राहक बनेर प्रहरीको एक टोली नै गाउँमा पुगेको थियो ।

चरेशसहित पक्राउ परेका २ जनालाई आवश्यक कारवाहीका लागि ब्युरोको टोलीले जिल्ला प्रहरी कार्यालय रोल्पामा बुझाएको छ ।