काठमाडौं । युक्रेनको मारियुपोलको सहर कब्जा गरेको तीन वर्ष पूरा भएपछि रुसले युद्धका कारण पलायन हुन बाध्य भएका युक्रेनीहरूका हजारौँ घर योजनाबद्धरूपमा जफत गरिरहेको खुलेको छ ।

बीबीसीले गरेको एक अनुसन्धानबाट रुसले कम्तीमा पाँच हजार ७०० घर जफत गर्न रेखांकित गरिएको देखाएको हो । सन् २०२४ को जुलाईदेखि रुसले नियुक्त गरेका नगर अधिकारीहरूले प्रकाशित गरेका कागजातहरूको विश्लेषणपछि बीबीसीले यस्तो निष्कर्ष निकालेको हो ।

युक्रेनी नागरिकले आफ्नो घर बचाउन रुस हुँदै मारियुपोल फर्किन सजिलो छैन । मारियुपोल फर्किन जोखिमपूर्ण यात्रा, कठोर सुरक्षा जाँच, जटिल ब्युरोक्रेटिक प्रक्रिया र रुसी पासपोर्ट स्वीकार गर्ने दबाबलाई पनि सामना गर्नुपर्ने हुन्छ ।

उक्त सहरबाट धेरैजसो युक्रेनीहरू सन् २०२२ मा रुसले गरेको ८६ दिने घेराबन्दीका बेला पलायन भएका वा मृत्युवरण गरेका थिए । ह्युमन राइट्स वाचको प्रतिवेदन अनुसार, त्यस क्रममा करिब आठ हजारभन्दा बढी मानिसको ज्यान गएको छ ।

योजनाबद्ध घर जफत गर्ने कार्य कब्जा गरिएको तटीय सहरलाई रुसीकरण गर्ने ठूलो योजनाको एक अंशजस्तो देखिने समाचारमा बताइएको छ । यसमा नयाँ सैन्य सुविधा निर्माण गर्ने र सडकको नाम रुस झल्किने राख्ने गर्नेजस्ता कार्यहरू छन् ।

ह्युमन राइट्स वाचले रुसी घेराबन्दीका कारण मारियुपोलको ९३ प्रतिशत (४४३ टावर) अग्ला भवन नष्ट वा क्षतिग्रस्त भएको बताएको छ । त्यसपछि, रुसले ७० भन्दा बढी नयाँ अपार्टमेन्ट ब्लक निर्माण गरेको समाचारमा दाबी गरिएको छ । 

बीबीसीले विश्लेषण गरेका कागजातका अनुसार, सहरका अधिकारीहरूले तुरुन्तै जफत गर्न दुईहजार २०० घर रेखांकित गरिसकेका छन् । यस्तै, तीन हजार ५५० घर सम्भावित जफतको सूचीमा छन् ।

रुसी कब्जाबाट बच्न अनुमानित तीन लाख ५० हजार युक्रेनीले मारियुपोल सहर छाडेका थिए । तीमध्ये एक हुन्, हल्याना । हल्यानाका अनुसार, करिब चार लाख २५ हजार जनसंख्या भएको तटीय सहरमा रहेको उनको अपार्टमेन्ट घेराबन्दीका बेला रुसी ट्यांक आगोले गम्भीररूपमा क्षतिग्रस्त भएको थियो ।

उनलाई भनेअनुसार, उनको अपार्टमेन्टका ढोका र झ्यालहरू मर्मत गरिएको छ । तर, उनको अनुमतिबिना नै त्यहाँ मानिसहरू बस्छन् । आफ्नो त्यो फ्ल्याट जफत हुन्छ कि भन्ने डर उनमा रहेको उनले बताइन् । “यो सम्पत्तिको कानुनी डकैती हो,” उनले भनिन् ।

रुसी अधिकारीहरूले भने ती घरहरूलाई 'घरधनी नभएका' भनेर चित्रित गर्ने गरेका छन् ।

बीबीसीबाट ।