काठमाडौं । सुप्रिम सहकारी ठगी तथा संगठित अपराधमा थुनामा रहेका पूर्वडीआईजी छविलाल जोशीले सर्वोच्च अदालतमा दायर गरेको रिट निवेदन न्यायाधीश विनोद शर्माको इजलासमा परेको छ ।

रूपन्देही जिल्ला अदालतका न्यायाधीश वशिष्ठकुमार घिमिरेको इजलासले जोशीलाई पुर्पक्षका लागि थुनामा पठाउने आदेश गरेको थियो । जिल्लाको आदेश उच्च अदालत तुलसीपुरको बुटवल इजलासबाट पनि सदर भएपछि जोशी सर्वोच्च पुगेका थिए । गत चैत ३१ मा उनले दर्ता गरेको पुनरावेदन निवेदन आज पेसीमा चढेको हो ।

यसअघि, रूपन्देही जिल्ला अदालतबाट सोही मुद्दामा एक करोड रुपैयाँ धरौटीमा रिहा भएका गोरखा मिडियाकै तत्कालीन प्रबन्ध निर्देशक रवि लामिछाने उच्च अदालत तुलसीपुरको बुटवल इजलासबाटै पुर्पक्षका लागि थुनामा गएका छन् ।

लामिछानेले थुनाबाटै सर्वोच्चमा पुनरावेदन गरेका थिए । उनको रिटमा सर्वोच्चका न्यायाधीश टेकप्रसाद ढुंगानाको इजलासले थुनामा पठाउने आदेशको कैफियत प्रतिवेदन झिकाउने आदेश गरेको छ ।