काठमाडौं । प्रधानमन्त्री केपी शर्मा ओलीले संसद्‌मा प्रतिनिधित्व गर्ने दलका नेताहरूको बैठक आह्वान गरेका छन् । आइतबार (चैत १७) साँझ ६ बजे प्रधानमन्त्री निवास बालुवाटारमा बस्ने गरी बैठक बोलाइएको छ ।

बैठकमा राजावादी दल राष्ट्रिय प्रजातन्त्र पार्टी (राप्रपा)लाई भने बोलाइएको छैन ।

गएको शुक्रबार (चैत १५) काठमाडौंको तीनकुनेमा राजावादी हिंसात्मक प्रदर्शनमा उत्रिएका थिए । त्यसबाट देशमा आतंक सिर्जना गर्ने प्रयत्न गरिएको कतिपय नेताको निष्कर्ष छ ।

सोही विषयमा गणतन्त्र पक्षधरको साझा धारणा र संसद् बैठक सुचारु गरेर सन्देश दिने प्रयासस्वरूप प्रधानमन्त्रीले सर्वदलीय बैठक डाकेको नेकपा (एमाले) संसदीय दलका प्रमुख सचेतक महेश बर्तौलाले बाह्रखरीलाई जानकारी दिए ।