काठमाडौं । संविधानसभा परिषद् नेपालले संविधानका विरुद्ध हुने कुनै पनि गतिविधि सह्य नहुने जनाएको छ । सोमबार (चैत ११) सिंहदरबारमा पत्रकार सम्मेलन गर्दै संविधानसभा परिषद् नेपालले संविधानको संरक्षण, सम्बद्र्धन र विकास गर्न प्रतिबद्ध रहने जनाएको छ ।

संविधानसभाबाट निर्मित संविधानको रक्षाका निम्ति सबै राजनीतिक दल, नागरिक समाज र बुद्धिजीवी एकजुट हुन आवश्यक रहेको संविधानसभा परिषद् नेपालले उल्लेख गरेको छ ।

यस्तै, भ्रष्टाचार नियन्त्रण, कानुनी शासन र सुशासनको प्रत्याभूति गर्दै नेपाली जनतालाई आश्वस्त र विश्वस्त बनाउने कार्यमा दलहरू जिम्मेवार बन्न जरुरी रहेको संस्थाको निष्कर्ष रहेको संविधानसभा परिषद् नेपालकी सहअध्यक्ष कल्पना धमलाले बताइन् ।

उनले जनताको अपेक्षाअनुसार सबै पक्षसँग बृहत् छलफल गरी संविधानमा रहेका कमी–कमजोरीलाई हटाई आवश्यकताअनुसार संविधान संशोधन गर्नुपर्ने धारणा राखिन् ।

पछिल्लो समय केही समूहद्वारा संविधानको भावनाविपरीत गतिविधि गरिरहेको भन्दै घोर भर्त्सना गरिएको उनले बताइन् । संवैधानिक व्यवस्थामाथिको हमलाविरुद्ध सबै एकजुट हुनुपर्ने उनको भनाइ थियो ।

संविधानसभा परिषद् नेपालका अध्यक्ष अनन्त पौडेलले संविधानमा देखिएका समस्या समाधान गर्ने व्यवस्था संविधानमा नै रहेको बताए । संविधानविपरीतको कुनै पनि गतिविधि स्वीकार्य नहुने उनले उल्लेख गरे । वर्तमान परिस्थितिप्रति दलहरू गम्भीर बन्नुपर्नेमा उनले जोड दिए ।

संविधानसभा परिषद् नेपालले नेपाली जनताको अभिमतबाट स्थापित लोकतान्त्रिक व्यवस्थाको रक्षा गर्न पनि अपिल गरेको छ ।