काठमाडौं । भारतले स्वीकृति नदिएपछि प्लाइउड बोकेका ३४ वटा ट्रक १० दिनदेखि रोकिएका छन् । मेची भन्सार कार्यालयका प्रमुख भन्सार अधिकृत राजेन्द्रप्रसाद चुडालका अनुसार, भारतको पोलेसीअनुसार जाँचपास नहुँदा ती ट्रकहरू मेची भन्सार पारि रोकिएका हुन् ।

“भारतको ब्युरो अफ इन्डियन स्टयान्डर्ड (बीआईएस)को स्टयान्डर्ड अनुसार नेपाली उद्योगीको सामान हुनुपर्ने भनिएको रहेछ । यही कुरा नमिलेर हाम्रो ३४ वटा गाडी पारि अड्किएको हो । १० दिन जति भयो जस्तो लाग्छ मलाई,” चुडालले भने, “निर्यातको अनुमति मिति फागुन २८ सम्मको थियो । हाम्रो भेन्डरको कुरा के हो भने, त्यो ब्युरोले नेपालमा आएर परीक्षण गर्नेरहेछ । त्यसको लागि हाम्रो पक्षबाट निश्चित शुल्क तिर्ने व्यवस्था छ ।”

यो भारतीय बजेटमै समेटिएको विषय भएकाले भारतीय पक्षलाई पैसा तिर्दा पनि जाँच नगरेको व्यवसायीहरूको भनाइ छ । “हाम्रा सबै इन्डस्ट्रिहरूले पैसा पनि तिरे त्योमध्ये आठ वटाले टेस्ट पनि गराए । आठ वटामध्ये दुईवटाले स्वीकृति पनि पाए । ६ वटाले टेस गराए तिनीहरूले के गराउने भन्ने स्वीकृति पाएको छैन,” चुडालले बाह्रखरीसित भने ।