काठमाडौं । राजावादीहरूले राजतन्त्र फर्काउने भन्दै ८६ वर्षीय नेता नवराज सुवेदीको नेतृत्वमा जनआन्दोलन निर्देशक समिति गठन गरेका छन् । पूर्वपञ्चहरूको बहुमत रहेको समितिमा राप्रपाका वरिष्ठ उपाध्यक्ष रवीन्द्र मिश्र सदस्य–सचिव बनेका छन् ।

राप्रपा नेपालका अध्यक्ष तथा पूर्वउपप्रधानमन्त्री कमल थापा निर्देशक समितिको नामावलीमा हिन्दु अभियन्ता अस्मिता भण्डारीपछि तेस्रो नम्बरमा छन् । राप्रपाका पूर्वअध्यक्ष पशुपति शमशेर राणा र डा. प्रकाशचन्द्र लोहनीभन्दा दुर्गा प्रसाईंको नाम माथिल्लो वरीयतामा राखिएको छ । पूर्वसञ्चारकर्मी रमा सिंह पनि निर्देशक समितिमा बसेकी छन् ।

कालीबाबा भेटेपछि जनआन्दोलन निर्देशक समिति राप्रपाबाट राजीनामा दिएर राजा ल्याउने आन्दोलनको नेतृत्व गर्ने भन्दै निर्देशक समिति गठन गरेका सुवेदीले गत शनिबार बिहान भारतबाट आएका ‘कालीदास बाबा’सँग भेटवार्ता गरेका थिए । शुक्रबार नेपाल आएर आइतबार फर्किएका कालीबाबासँग अन्य दलका नेताहरूले पनि भेटवार्ता गरेका थिए ।

पत्रकार सम्मेलनमा कुन कुन नेताले भेट गरे भन्ने प्रश्नमा कालीबाबाले धेरैजना भेटेकाले आफूले सबैको नाम बताउन नसक्ने जवाफ दिएका थिए । त्यसरी भेट्ने मध्ये विशेष समय मागेर छुट्टै भेट्नेमा सुवेदी दिए । शनिबार बिहान ६ः३० मा कालीबाबा बसेको तिलगंगास्थित होटेल आनन्दमा भेटवार्ता गरेका सुवेदीले एक्लाएक्लै भेटको सर्त राखेका थिए । उनको भेटका लागि कालीबाबासँग सरकारी सञ्चारमाध्यामका एक पत्रकारले सहजीकरण गरिदिएका थिए । ती पत्रकारले भेटका लागि आफूले सहजीकरण गरिदिए पनि भेटवार्ताका विषयमा भने कुनै जानकारी नभएको बताए ।

“कालीबाबाको निर्देशनमा जनआन्दोलन निर्देशक समिति गठन भएको हो वा समिति बनाउने विषय कालीबाबालाई जानकारी मात्र गराइएको भन्ने विषयमा म जानकार छैन,” ती पत्रकारले बाह्रखरीसँग भने, “उहाँ (सुवेदी)ले भेट्न खोज्नुभएको थियो । समय माग्दा कालीबाबाले पनि भेट्न खोजेको पाए ।”