काठमाडौं । सरकारका प्रवक्ता एवं सञ्चार तथा सूचना प्रविधिमन्त्री पृथ्वीसुब्बा गुरुङले नेकपा (माओवादी केन्द्र)ले ‘जनयुद्ध’ बेचेर खाएको आरोप लगाएका छन् । सहिद यदुकुमार गौतमको २६औँ स्मृति दिवसका अवसरमा बुधबार (फागुन २१) राजधानीमा आयोजित एक कार्यक्रममा उनले माओवादी हिंसा भन्ने शब्दबाट किन भागेको ? भन्दै प्रश्न गरे ।

“माओवादी हिंसा भन्ने शब्दबाट किन भागिरहेको छ ? माओवादबाट किन भागिरहेको छ ? जनयुद्ध त बेचेर खाइसक्यो,” उनले भने ।

उनले माओवादी संकटमा भएर नाटक गरिरहेको बताए । “माओेवादको औचित्य समाप्त भयो । माओवादको ट्याग लगाइरहेको छ । जनयुद्ध ठिक भन्न सकेको छ आज ?,” उनले प्रश्न गरे ।

गाउँ रित्तो हुन ‘जनयुद्ध’कालबाट सुरु भएको उनले टिप्पणी गरे । “हामी आज गाउँ रित्तो भयो भन्छौँ, गाउँ रित्तो हुनुको प्रारम्भ जनयुद्धबाट सुरु भएको हो । सुरक्षाका लागि मानिस सहर पसे,” उनले भने ।

उनले राजतन्त्र ‘बुलेट’बाट नभएर ‘ब्यालेट’बाट पराजित भएको बताए । ‘जनयुद्ध’ गलत भएको उनको भनाइ थियो ।

नेकपा (एमाले)का उपमहासचिव समेत रहेका गुरुङले माओवादीलाई रुकुम, रोल्पाबाट पराजित नगरे देशमा अस्थिरता कायमै रहने पनि बताए ।

सामाजिक सञ्जालबाट धर्म, सांस्कृतिक सहअस्तित्व भड्काउन मानिस प्रयोग गरिएको उनले जिकिर गरे । त्यसलाई रोक्न आवश्यक रहेकामा उनले जोड दिए ।

कार्यक्रममा २३औँ यदुस्मृृति पत्रकारिता पुरस्कारबाट वरिष्ठ पत्रकार दिलभूषण पाठकलाई पुरस्कृत गरियो ।