काठमाडौं । सञ्चार तथा सूचना प्रविधिमन्त्री पृथ्वीसुब्बा गुरुङले मन्त्रीहरू अवसरवादमा लिप्त हुँदा कानुन कार्यान्वयन प्रभावित भएको बताएका छन् । मंगलबार (फागुन २०) नेपाल दूरसञ्चार प्राधिकरणको २७औँ वार्षिकोत्सवका अवसरमा आयोजित कार्यक्रममा उनले यस्तो बताएका हुन् ।

मन्त्रीपिच्छे आफूअनुकूलको नियमावली बनाउने रोग भएका कारण कानुन कार्यान्वयन प्रभावित भएको उनले उल्लेख गरे । कानुनलाई समयानुकूल परिवर्तन र प्रभावकारी कार्यान्वयनका निम्ति नियमावलीमा ‘खेल्ने’ प्रवृत्तिको अन्त्य गर्न जरुरीमा उनले जोड दिए ।

“...समयमै कानुन अपडेट गर्ने कुरामा हाम्रो ध्यान जाँदो रै’नछ । नीति अपडेट गर्ने कुरामा हामीले ध्यान दिँदैनौँ । अनि, हामी अवसरवादमा लिप्त छौँ,” उनले भने, “आफूअनुकूलको नियमावली बनाएर, नियमावलीको राज चलिरहेको छ मन्त्रालयमा । हामीले धेरैपटक मन्त्रिपरिषद्मा समेत छलफल गरेर नियमावली, विनिमावलीको राज गर्ने कुराको अन्त्य गर्नुपर्छ भनेर छलफल गरेका छौँ ।”

मन्त्री गुरुङले दूरसञ्चार प्राधिकरणको पुँजीगत खर्च न्युन रहेको बताए । उक्त खर्च बढाउन उनले निर्देशन दिए । उनले प्राधिकरणको प्रशासनिक कमजोरी धेरै भएका कारण समस्या निम्तिएको भन्दै सुधार गर्न सुझाव दिए । न्युज एजेन्सी नेपाल